(ඩයනා උදයංගනී)
           
ශ්‍රී ලංකාවේ ගිනිකොණ දෙසින් වන මුහුදු ප‍්‍රදේශයේ පහළ වායුගෝලයේ පවතින කැළඹිලි ස්වභාවයක් හේතුවෙන් දිවයින අවට මුහුදු ප‍්‍රදේශ රළු විය හැකි බව කාලගුණ විද්‍යා දෙපාර්තමේන්තුව පවසයි.
           
මඩකලපුව සිට පොතුවිල් හරහා හම්බන්තොට දක්වා මුහුදු ප‍්‍රදේශවල තද වැසි සමඟ පැයට කිලෝමීටර 70ක 80ක පමණ වේගවත් තද සුළං ද ඇතිවන බව කාලගුණ විද්‍යා දෙපාර්තමේන්තුවේ අනාවැකිකරණ අංශයේ නියෝජ්‍ය අධ්‍යක්‍ෂ මෙරිල් මෙන්ඩිස් මහතා පැවසීය.
           
දිවයිනේ බොහෝ ප‍්‍රදේශවලට අද (25) පස්වරුවේද වැසි ඇතිවන බව ඔහු පැවසීය.
           
මේ අතර දිවයිනට ගිනිකොණ දෙසින් කැළඹිලි ස්වභාවයක් වර්ධනය වෙමින් පැවතීම හේතුවෙන් හෙට (26) රාත‍්‍රියේ සිට පළාත් කිහිපයකට තද වැසි ඇතිවන බව නියෝජ්‍ය අධ්‍යක්‍ෂවරයා සඳහන් කළේය.
           
විශේෂයෙන් උතුර, නැගෙනහිර, උතුරු මැද සහ ඌව පළාත්වලට මෙහි වැඩි බලපෑමක් ඇතිවන බවද, බස්නාහිර, වයඹ සහ සබරගමුව පළාත්වල සහ ගාල්ල, මාතර දිස්ත‍්‍රික්කවල තැනින් තැන වැසි හෝ ගිගුරුම් සහිත වැසි ඇතිවන බවද මෙරිල් මෙන්ඩිස් මහතා පැවසීය.
           
සෙසු ප‍්‍රදේශයන්හිද පස්වරු 1.00න් පසු වැසි ඇතිවන බව නියෝජ්‍ය අධ්‍යක්‍ෂවරයා සඳහන් කළේය.
           
මධ්‍යම, සබරගමුව, ඌව සහ උතුරු මැද පළාත්වල උදෑසන කාලයේදී මීදුම් තත්ත්වයක් ඇතිවන බව ද එම ප‍්‍රකාශකයා කීවේය.
           
ගිගුරුම් සහිත වැසි ඇතිවන අවස්ථාවලදී තාවකාලික තද සුළං සහ අකුණු අනතුරුද ඇතිවිය හැකි බැවින් අනතුරු අවම කරගැනීමට ක‍්‍රියාකරන්නැයි කාලගුණ විද්‍යා දෙපාර්තමේන්තුව ජනතාවට දැනුම් දෙයි.
           
දිවයින වටා මුහුදු ප‍්‍රදේශවලද වැසි හෝ ගිගුරුම් සහිත වැසි ඇතිවන අතර එම අවස්ථාවලදී මුහුදු ප‍්‍රදේශ ඉතා රළු විය හැකි බැවින් ධීවර හා නාවික කටයුතුවලදී විමසිලිමත් විය යුතු බවද මෙරිල් මෙන්ඩිස් මහතා පැවසීය.