2021 දෙසැම්බර් මස 03 වන සිකුරාදා
(විජේරත්න රත්නායක)
ටී-56 පතුරොම් 152 ක්ද සමඟ සැකපිට අත්අඩංගුවට ගත් මුස්ලිම් ජාතික පාසල් ගුරුවරයා ඇතුළු පුද්ගලයින් තිදෙනා පිළිබඳ පරීක්ෂණ ත්‍රස්ත විමර්ශන කොට්ඨාසයට භාරදුන් බව බණ්ඩාරවෙල ජ්‍යෙෂ්ඨ පොලිස් අධිකාරී සුදත් මාසිංහ මහතා අද (08) පැවසීය.
ඉකුත් 21 වැනි දින සිදුවූ ත්‍රස්ත ප්‍රහාරයට අදාළව අප්‍රේල් 22 වැනි දින සිදුකරන ලද සෝදිසියේදී මෙසේ අත්අඩංගුවට ගෙන ඇත්තේ දියතලාව කහගොල්ලේ පදිංචි හා එම ප්‍රදේශයේ ප්‍රසිද්ධ විදුහලක ගුරුවරයෙකු සහ ඔහුගේ පුතුන් දෙදෙනාය.
සෝදිසියේදී සැකකරුවන්ගේ නිවසේ තිබී ටී-56 ගිනි අවි සඳහා භාවිත කරන පතුරොම් 152 ක් හමුවී ඇති අතර ඒවා දියතලාව ගුවන් හමුදා වෙඩිපිටියෙන් වරින්වර අහුලාගත් ඒවා බව සැකකරුවන් පවසා ඇත. එහෙත් පතුරම් අසුරණ පෙට්ටිද එම නිවසේ තිබීම නිසා නිවෙස් හිමි අදාළ ගුරුවරයා සහ ඔහුගේ වැඩිමල් පුත්‍රයා වන ත්‍රිරෝද රථ රියදුරෙකුද යාපනය විශ්වවිද්‍යාලයේ ශිෂ්‍යයෙකු වූ බාල පුත්‍රයාද සැකපිට අත්අඩංගුවට ගෙන තිබිණි.
මෙම ගුරුවරයාගේ වැඩිමල් සහෝදරයාගේ පුතෙකු ද තවුහීත් ජමාත් කල්ලියට සම්බන්ධ බවට සැකපිට නිකවැරටිය ප්‍රදේශයේදී පොලිස් අත්අඩංගුවට පත්ව සිටින බවද මෙම සැකකරු සිංහල අවුරුද්දට පෙර දියතලාවේ වෙළඳසැලකින් එකම වර්ගයේ කමිස 11 ක් මිලට ගෙන ඇති බවද අනාවරණය වී ඇත.
මේ පිළිබඳ වැඩිදුර පරීක්ෂණ ත්‍රස්ත විමර්ශන කොට්ඨාසයට භාරදුන් බව බදුල්ල දිස්ත්‍රික් ලේකම් කාර්යාලයීය ශ්‍රවනාගාරයේදී අද (08) පැවැති බදුල්ල දිස්ත්‍රික් ආරක්ෂක කමිටු රැස්වීමේදී බණ්ඩාරවෙල ජ්‍යෙෂ්ඨ පොලිස් අධිකාරී සුදත් මාසිංහ මහතා පැවසීය.
