(දසුන් රාජපක්ෂ) 
 
ජාත්‍යන්තර නීති උල්ලංඝනය කරමින් ධීවර කටයුතුවල නිරතවීම හේතුවෙන් අත්ඩංගුවට ගෙන මාලදිවයිනේ රඳවා සිටි ශ්‍රී ලංකාවේ ධීවරයන් අටදෙනෙකු නිදහස් කර ඇති බව ධීවර හා ජලජ සම්පත් අමාත්‍යාංශය පවසයි.

මාලදිවයිනෙහි නාවික හමුදාව ඉකුත් 16 වැනි දින අත්අඩංගුවට ගත් මෙම ධීවරයෝ ගාල්ලේ පදිංචිකරුවෝ වෙති.
 
ධීවරයන් අටදෙනා සහ ඔවුන්ගේ ධීවර යාත්‍රා හය හෙට (20) මෙරටට රැගෙනඒමට නියමිත බව ධීවර හා ජලජ සම්පත් අමාත්‍ය ඩග්ලස් දේවානන්ද මහතා සඳහන් කළේය.
 
මෙම ධීවරයන් ඉකුත් 13 වැනිදා ගාල්ල ධීවර වරායෙන් මසුන් ඇල්ලීමට පිටත්ව ඇති අතර ඔවුන්ගේ සබඳතා නතරවීම හේතුවෙන් සොයාබැලීමේදී මාලදිවයිනේ නාවික හමුදාව බාරයට පත්ව ඇතැයි වාර්තා වූ බව ඩග්ලස් දේවානන්ද මහතා කියා සිටියේය.
 
ඒ අනුව මාලදිවයින් රජය මේ සම්බන්ධයෙන් දැනුවත් කර ධීවරයන් හුවමාරු කරගැනීමේ අවබෝධතා ගිවිසුමට අනුව ඔවුන් සහ ධීවර යාත්‍රා නිදහස් කිරීමට මාලදිවයින් රජය පියවර ගත් බව අමාත්‍යවරයා වැඩිදුරටත් කීය.