(ඔගස්ටින් ප්‍රනාන්දු)

කොරෝනා වසංගත තත්ත්වය යටතේ සෙඛ්‍ය අංශ මගින් පනවා ඇති නීති රිති යටතේ හලාවත මුන්නේශ්වරම ශ්‍රී ඊශ්වර මහා දේවාලයේ වාර්ෂික නිකිණි පුජා මහෝත්සවය චාරිත්‍රානුකූලව චාම් අයුරින් පැවැත්වීමට සියලු කටයුතු සුදානම් කර ඇති බව එම දේවාලයේ ප්‍රධන පුජක බ්‍රාහ්මසාරි එස්. පත්මනාභ කුරුක්කල්වරයා  එම දේවාලයේ දි පැවැති මාධ්‍ය හමුවක දි ප්‍රකාශ කළේය.

තවදුරටත් කුරුක්කල්වරයා මෙසේ ද කීහ.

''කොරෝනා වසංගතය මර්දනය කිරීමට රජය විසින් මේ වන විට විවිධ සෞඛ්‍ය නීති රිති පනවා ඇති නමුත් මෙම දේවාලයේ මහා මංගල්‍ය චාර්ත්‍රාණුකුලව පැවැත්විය යුතුවෙනවා. ඒ අනුව මෙවර මංගල්‍යය පැවැත්වෙන කාලයේ දි මෙහි එන සියලු බැතිමතුන් විශේෂයෙන්ම එම නීති රිති කෙරෙහි වැඩි සැලකිල්ලක් යොමු කිරිම වැදගත්වේ.
තම සිරුරේ උෂ්ණත්වය කෙරෙහි මෙන්ම සමාජ දුරස්ථභාවය ආරක්ෂා කරමින් කටයුතු කිරීමටද උනන්දු විය යුතුයි. හලාවත සෞඛ්‍ය වෛද්‍ය නිලධාරි කාර්යාලය මෙන්ම පොලිසිය මෙහි ළගා වන බැතිමතුන් කෙරෙහි දැඩි අවධානයකින් යුතුව කටයුතු කරනවා.

අගෝස්තු මස 5 වන දින දහවල් 12 ට යෙදෙන සුබ මොහොතින් සම්ප්‍රදායානුකූලව කප් සිටුවා උත්සව සමය ආරම්භ වෙනවා. රථෝත්සවය 31 වන දින දහවල් වරුවේද සැප්තැම්බර් මස 1 වන දින දියකැපීම ද සිදුවෙනවා.  සියලු පෙරෙහැර වෙනත් උත්සව සමයන්හි පැවැති ආකාරයෙන් බැහැරව කෙටි ක්‍රමයන් අනුව සිදුකරන්න නියමිතයි.

විශාල වශයෙන්  බැතිමතුන්ට කිසිදු පූජාවකට සහභාගිවීමට අවස්ථාව නොලැබෙන අතර තනි තනි වශයෙන් සියලු ආගමික කටයුතු කිරීමට පහසුකම් සලසා තිබෙනවා.

කිසිදු බැතිමතෙකුට නවාතැන් ගැනීමට පහසුකම් සලසා නැහැ. වෙළද සැල්  පැවැත්වීමට අවසර නැහැ.  දිය කැපීමෙන් පසු පෙරහැර හලාවත නගරයේ වීදි සංචාරය කරන්නේද නැහැ'' යැයි ඔහු කීය.