ඉදිරි මැතිවරණ වඩාත් ස්වාධීන හා සාධාරණ ලෙස පැවැත්වීම තහවුරු කිරීම සඳහා මාධ්‍ය උපමාන නීතියක් ලෙස සම්මත කර ගැනීමට පාර්ලිමේන්තුවේ සහාය ලබාදෙන ලෙස මැතිවරණ කොමිසමේ සභාපති මහින්ද දේශප්‍රිය මහතා කථානායක කරූ ජයසූරිය මහතාගෙන් ඉල්ලා සිටියේය.

මේ සඳහා වන යෝජනා ඉදිරියේ දී පාර්ලිමේන්තුවට ඉදිරිපත් කරනු ලබන බවද මහින්ද දේශප්‍රිය මහතා සඳහන් කළේය.

දැනට අත්හිටුවා ඇති පළාත් සභා මැතිවරණය ඉක්මණින්ම පැවැත්වීම සඳහා අවශ්‍ය රෙගුලාසි පාර්ලිමේන්තුවේදී හැකි ඉක්මණින් සම්මත කර දෙන මෙන් ද මැතිවරණ කොමිසමේ සභාපතිවරයා කථානායක කරූ ජයසූරිය මහතාගෙන් ඉල්ලා සිටියේය.

මෙයට අමතරව පසුගිය 2018 වසරේ දී පැවති පළාත් පාලන මැතිවරණයේ දී හඳුනාගත් අඩුපාඩු නිවැරදි කර ගැනීම සඳහා වන නව සංශෝධන පළාත් පාලන මැතිවරණ පනතට ඉදිරිපත් කිරීමට බලාපොරොත්තු වන බවද දේශප්‍රිය මහතා සඳහන් කළේය.

පසුගිය ජනාධිපතිවරණය පැවැත්වුණු ආකාරය පිළිබඳව කථානායකවරයා දැනුම්වත් කිරීමට මැතිවරණ කොමිසමේ සාමාජිකයන් පාර්ලිමේන්තුවේ දී කරු ජයසූරිය මහතා හමුවූ අවස්ථාවේදී ඉහත කරුණු සාකච්ජා කෙරිණි.

මැතිවරණ කොමිසමේ සෙසු සාමාජිකයින් වන නලින් ජයන්ත අබේසේකර,මහාචාර්ය රත්නජීවන් හූල් යන මහත්වරුන් සහ කොමිසමේ ලේකම් ටී.ඩී. හේරත් මහතා සහ මැතිවරණ කොමසාරිස් ජෙනරාල්  සමන් ශ්‍රී රත්නායක මහතා ද මෙම අවස්ථාවට එක්ව සිටියහ.

කථානායක ජයසූරිය මහතා සමඟ පාර්ලිමේන්තුවේ මහ ලේකම් ධම්මික දසනායක මහතා සහ නියෝජ්‍ය මහ ලේකම් හා කාර්ය මණ්ඩල ප්‍රධානී නීල් ඉද්දවල මහතා ද මෙම අවස්ථාවට සහභාගී වූහ.

ඉදිරි මැතිවරණ වඩාත් ස්වාධීනව හා සාධාරණව පැවැත්වීමට අවශ්‍ය වටපිටාව සැකසීමට අවශ්‍ය මාධ්‍ය උපමාන නීතියක් බවට පත්කිරීමට අවශ්‍ය සහයෝගය පාර්ලිමේන්තුව වෙතින් ලබාදීමට කටයුතු කරන බව කථානායකවරයා මෙහිදී සඳහන් කළේය.

එමෙන්ම පසුගිය ජනාධිපතිවරණය ස්වාධීන හා සාධාරණව පැවැත්වීමට මැතිවරණ කොමිෂන් සභාව ගත් පියවර කථානායකවරයාගේ පැසසුමට ලක් විය.

යම් ලෙසකින් ජනාධිපති ගෝඨාභය රාජපක්ෂ මහතා ලබන මාර්තු 01 වැනිදායින් පසු පාර්ලිමේන්තුව විසුරුවා හැරීමක් සිදු කළහොත් 2020 අප්‍රි‍යෙල් මහ අගදී හෝ මැයි මුල් සතියේදී පාර්ලිමේන්තු මැතිවරණය පැවැත්විය හැකි බව මහින්ද දේශප්‍රිය මහතා වැඩිදුරටත් පැවසීය.