(සුජිත් හේවාජුලිගේ සහ අංජුල මහික වීරරත්න)

මැතිවරණ නීති සකස් කිරීම සම්බන්ධයෙන් දේශපාලන පක්ෂ රැසක නියෝජිතයන් ඉදිරිපත් කළ යෝජනාවලටමැතිවරණ නීති ප්‍රතිසංස්කරණය සඳහා පත් කෙරුණු පාර්ලිමේන්තු විශේෂ කාරක සභාවේ ඉහළ අවධානය යොමුවිය.

මැතිවරණ නීති සකස් කළ යුතු ආකාරය සම්බන්ධයෙන් දේශපාලන පක්ෂ රැසක නායකයෝ මැතිවරණ නීති ප්‍රතිසංස්කරණ සඳහා පත් කෙරුණු පාර්ලිමේන්තු විශේෂ කාරක සභාව හමුවේ ඊයේ (29) සිය යෝජනා ඉදිරිපත් කළහ.

මැතිවරණවලදී කාන්තා නියෝජනය ඉහළ නැංවීම සඳහා නීතියෙන්ම කටයුතු කළ යුතු බව සෞඛ්‍ය ඇමතිනී පවිත්‍රා වන්නිආරච්චි මහත්මිය එම කමිටුවට දැනුම් දුන්නාය.

මනාප ක්‍රමයත් සමඟ කාන්තාවන්ට තරඟ කිරීමට අපහසු බවත් කාන්තාවන් බොහෝ විට දේශපාලනයට පැමිණෙන්නේ සිය පවුල් පසුබිම තුළින් බවත් ඇය එහිදී කීවාය.

එවැනි පසුබිමක් නැති කාන්තාවන්ට පාර්ලිමේන්තුවට පැමිණීම අතිශය අසීරු බවත් සෞඛ්‍යය ඇමතිවරිය කාරක සභාවේදී අවධාරණය කළාය.

සභානායක අමාත්‍ය දිනේෂ් ගුණවර්ධන මහතාගේ ප්‍රධානත්වයෙන් මැතිවරණ නීති ප්‍රතිසංස්කරණය කිරීමේ පාර්ලිමේන්තු විශේෂ කාරක සභාව පාර්ලිමේන්තු සංකීර්ණයේදී ඊයේ (29)රැස්විය .

සම්පූර්ණයෙන්ම කේවළ ක්‍රමය යටතේ මැතිවරණ පැවැත්වුවහොත් විශාල අසමතුලිතතාවයක් හටගන්නා බව අමාත්‍ය මහාචාර්‍ය ජී.ඇල් පීරීස් මහතා කාරක සභාවේදී ඊයේ පෙන්වා දුන්නේය.

මෙහිදී අදහස් දැක්වූ සමගි ජනබලවේගයේ පාර්ලිමේන් බලවේගයේ පාර්ලිමේන්තු මන්ත්‍රී රංජිත් මද්දුම බණ්ඩාර මහතා පැවසූයේ එකම දිනයක ජනාධිපතිවරණය සහ මහමැතිවරණය පැවැත්වීමට කටයුතු කළ යුතු බවයි.

මේ අතර පාර්ලිමේන්තුව නියෝජනය නොකරන දේශපාලන පක්ෂ 06 නියෝජිතයෝ මැතිවරණ නීති ප්‍රතිසංස්කරණ විශේෂ කාරක සභාව හමුවේ ඊයේ කරුණු ඉදිරිපත් කළහ.

මෙහිදී අදහස් දැක් වූ ලිබරල් පක්ෂයේ මහලේකම් කමල් නිශ්ශංක මහතා සඳහන් කළේ ශ්‍රී ලංකාව සඳහා නවසීලන්තයේ පවතින මැතිවරණ ක්‍රමය භාවිත කිරීම යෝග්‍ය බවයි.

තම පක්ෂය දිස්ත්‍රික් අනුපාත ක්‍රමයට විරුද්ධ බව පැවසූ හෙතෙම ජාතික ලැයිස්තු ක්‍රමය එලෙසම පවත්වා ගත යුතු බවද ප්‍රකාශ කළේ‍ය

පාර්ලිමේන්තුවට මන්ත්‍රීවරයන් 225 දෙනා තෝරා ගැනීමේදී 160 දෙනෙකු ජන්දයෙන්ද 65 දෙනෙකු ජාතික ලැයිස්තුවෙන්ද පත් කළ යුතු බවට කමල් නිශ්ශංක මහතා එහිදී යෝජනා කළේය.

අකිල ඉලංගෙයි ද්‍රවිඩ මහ සභාවේ සභාපති කේ.විග්නේෂ්වරන් මහතා කාරක සභාව හමුවේ කරුණු දක්වමින් පැවසුවේ තිස්වසරක් පුරා රටේ පැවැති යුද්ධය හේතුවෙන් විදෙස් ගතවූ ලක්ෂ දහයකට වැඩි ජනතාවට ජන්දය ලබා දීම සඳහා අවස්ථාව සැළසිය යුතු බවයි.

ඒ සඳහා නව නීති හඳුන්වා දිය යුතු බවත් එය කාලීන අවශ්‍යතාවක් බවත් ඔහු පෙන්වා දුන්නේය.

කාන්තා නියෝජනය සියයට 30 කින් ඉහළ නැංවිය යුතු බවට තෙමල සමාජ ප්‍රජාතන්ත්‍ර පක්ෂයේ නියෝජිතයා කාරක සභාවේදී කරුණූ දක්වමින් කීවේය.

එය පාර්ලිමේන්තුව, පළාත් සභා සහ පළාත් පාලන ආයතනවලටද අදාළ විය බව ඔහු වැඩිදුරටත් පෙන්වා දුන්නේය .

පවතින සමානුපාතික ක්‍රමය කිසිදු වෙනසකින් තොරව අඛණ්ඩව ක්‍රියාත්මක කළ යුතු බව සමත්තුවකච්චි පක්ෂය කාරක සභාවේදී අවධාරණය කළේය.

එම ක්‍රමය යටතේ සියලු ජාතින්ට පාර්ලිමේන්තුව නියෝජනය කිරීමට අවස්ථාව හිමිවන බවත්, ප්‍රජාතන්ත්‍රවාදයට එය ඉතා වැදගත් සාධකයක් බවත් එම පක්ෂයේ නියෝජිතයෝ පෙන්වා දුන්හ .

පළාත් සභා වල කාන්තා නියෝජනය සියයට 25 ක් දක්වා ඉහළ නැංවිය යුතු බවටද විදෙස් ගතව සිටින සහ අවතැන්ව සිටින පාර්ශ්වයන්හි ජන්ද අයිතිය සුරැකිය යුතු බවටද එම පක්ෂය වැඩිදුරටත් යෝජනා කළේය.

මැතිවරණ නියම වේලාවට පැවැත්වීමට අවශ්‍ය නීති කඩිනමින් සම්පාදනය විය යුතු බව එක්සත් සාම සන්ධානය කාරක සභාවේදී කීවේය.

අපේක්ෂකයන් සිය වත්කම් බැරකම් ප්‍රකාශ ප්‍රමාද නොවී මැතිවරණ කොමිෂන් සභාවට ලබා දීමට ක්‍රමවේදයක් සැකසීමේ අවශ්‍යතාවද එම සන්ධානය කාරක සභාවේ දී පෙන්වා දුන්නේය .

දේශපාලන පක්ෂ සන්ධාන ගත වීම වැළැක්විම සඳහා නිසි ප්‍රතිපත්තියක් සැකසිය යුතු බව සිංහලදීප ජාතික පෙරමුණ පැවසීය

මැතිවරණ ජයග්‍රහණය කිරීමෙන් අනතුරුව වෙනත් පක්ෂවලට සහය දක්වන මන්ත්‍රීවරයන්ගේ මන්ත්‍රීධූරය අහෝසි කිරීම සඳහාද නව නීති සම්පාදනයේදී අවධානය යොමු කළ යුතු බව එම පෙරමුණ කාරක සභාවේදී වැඩිදුරටත් කීවේය.

ලබන මාසයේදී දින හතරක් මෙම කාරක සභාව රැස්වන බව එහි ලේකම්, පාර්ලිමේන්තුවේ කාර්ය මණ්ඩල ප්‍රධානී සහ පාර්ලිමේන්තුවේ නියෝජ්‍ය මහ ලේකම් කුෂාණී රෝහණදීර මහත්මිය සඳහන් කළාය.

මෙම කාරක සභා රැස්වීමට අමාත්‍ය නිමල් සිරිපාල ද සිල්වා, පාර්ලිමේන්තු මන්ත්‍රීවරුන් වන මනෝ ගනේෂන්,මධුර විතානගේ, සාගර කාරියවසම් යන මහත්වරුන් , මැතිවරණ කොමිෂන් සභාවේ හිටපු සභාපති මහින්ද දේශප්‍රිය, මැතිවරණ කොමිෂන් සභාවේ නිලධාරීන් , නිතිපති දෙපාර්තමේන්තුවේ නිලධාරින් ඇතුළු පිරිසක්ද සහභාගි වූහ .