ශ්‍රී ලංකා මැතිවරණ කොමිෂන් සභාව සහ මැතිවරණ ක්‍රම සඳහා වූ ජාත්‍යන්තර සම්මේලනය හා එක්ව ශ්‍රී ලංකා නීතිඥ සංගමය විසින් ‘මැතිවරණ නීති සහ පරිපාලනය’ යන මැයෙන් සහතික පත්‍ර පාඨමාලාවක් සංවිධානය කරනු ලැබ තිබේ.
 
ශ්‍රී ලංකාව තුළ පලදායී සහ විනිවිද මැතිවරණ ක්‍රියාවලියක් නිර්මාණය හා ස්ථාපිත කිරීම සඳහා මැතිවරණ හා ප්‍රජාතන්ත්‍රවාදී පාලනය කෙරෙහි උනන්දුවක් දක්වන නෛනික ක්ෂේත්‍රයේ නියැළෙන්නන්, රාජ්‍ය නිලධාරීන්, සිවිල් ක්‍රියාකාරීන් සහ අනෙකුත් පාර්ශවකරුවන් උදෙසා මෙම සහතිකපත්‍ර පාඨමාලාව සංවිධානය කරන බව ශ්‍රී ලංකා නීතිඥ සංගමය සඳහන් කරයි.
 
මෙම පාඨමාලාවේ දේශන මාර්ත-ු 1 වැනිදා සිට ජූනි 21 වැනිදා දක්වා ශ්‍රී ලංකා නීතිඥ සංගමයේ ‘රාජ නීතිඥ ආචාර්ය එච්.ඩබ්ලිව්. ජයවර්ධන’ ශ්‍රවණාගාරයේදී පස්වරු 3 සිට 5 දක්වා රජයේ නිවාඩු දින හැර අන් සෑම සිකුරාදා දිනයකදීම පැවැත්වෙන බව ශ්‍රී ලංකා නීතිඥ සංගමය කියයි. 
 
මැතිවරණ කොමිෂන් සභාවේ සාමාජිකයන් වන මහින්ද දේශප්‍රිය, ජනාධිපති නීතිඥ නලින් අබේසේකර, ජනාධිපති නීතිඥ සාලිය පීරිස්, කොළඹ විශ්වවිද්‍යාලයේ සම්මානිත මහාචාර්ය සිරි හෙට්ටිගේ ඇතුළු ක්ෂේත්‍රයේ විශාරදයන් පිරිසක් මෙහි දේශන පවත්වන බව ද එම සංගමය සඳහන් කරයි.
 
ශ්‍රී ලංකා නීතිඥ සංගමයේ වැඩසටහන් කමිටුවේ 076 440 8342 යන දුරකතන අංකයෙන් පාඨමාලාව පිළිබඳ වැඩිදුර විස්තර ලබාගත හැකිය. 
 
 
055