(නිශාන්ත කුමාර)

මීගහකිවුල පිටමාරුව ප්‍රධාන මාර්ගයේ වෙන්දේසියාය මහා වංගුව ප්‍රදේශයේදී පෞද්ගලික බස් රථයක් අඩි 55 ක පමණ ප්‍රපාතයකට පෙරැළීමෙන් එහි ගමන් ගත් පුද්ගලයන් නව දෙනෙකු තුවාල ලබා රෝහල් ගත කර ඇතැයි කන්දකැටිය පොලිසිය පැවසීය.

තුවාල ලැබූ පිරිස මීගහකිවුල රෝහලට ඇතුළත් කිරීමෙන් පසුව ඉන් දෙදෙනෙකු වැඩිදුර ප්‍රතිකාර සඳහා බදුල්ල මහ රෝහල වෙත මාරු කර යැවූ බව පොලිසිය සඳහන් කළේය.

තුවාල ලැබූවන් අතර වයස අවුරුදු දහයක පාසල්  ශිෂ්‍යාවක් හා බස් රථයේ රියදුරාද  වන බව පොලිසිය කීය.

අනතුරු සිදුවන අවස්ථාවේ බස් රථයේ මගින් 50 ත් 60 ත් අතර  ප්‍රමාණයක් ගමන් ගෙන ඇති බව පොලිසිය පැවැසීය.

කඳු සහිත මාර්ගයේ ධාවනය වෙමින් තිබූ බස් රථය එක් වරම පසු පසට ධාවනය වී ප්‍රපාතයකට පෙරැළි ගොස් ගසක සිරවීමෙන් අනතුර සිදු වූ බව බස් රථයේ ගමන් ගත් මගීහු පැවසූහ.

බස්රථයේ රියදුරාගේ දක්ෂතාවය හේතුවෙන් සිදුවීමට තිබූ මහා විනාශයක් වළක්වා ගත් බව බස් රථයේ ගමන් ගත් මගීහු කියා සිටියහ.

මීගහකිවුල ප්‍රාදේශීය ලේකම් එන්.පී සමරවික්‍රම මහත්මිය , කන්දකැටිය පොලිස් ස්ථානාධිපති පොලිස් පරීක්ෂක ඩබ්ලිව්.එම් සිරිවර්ධන මහතා ඇතුළු පිරිසක්ද  අනතුර සිදුවූ ස්ථානයට පැමිණ සිටියහ.

අනතුර සම්බන්ධයෙන් කන්දකැටිය පොලිසියේ රථවාහන අංශය වැඩිදුර පරීක්ෂණ පවත්වයි.