(පුෂ්පකුමාර මල්ලවආරච්චි)

මීගමුව පිටිපන වෙරළ තීරයේ මෝරවල ප‍්‍රදේශයේ මුහුදු වෙරළ දරුණු ලෙස ඛාදනය වීම හේතුවෙන් වෙරළ තීරයේ නිවාස පහක තාප්ප මුහුදට බිලිවී තිබේ.

පිටිපන මෝරවල සිට තලාහේන පේරුව දක්වා ප‍්‍රදේශය මෙසේ  මුහුදු ඛාදනයකට ලක්ව ඇති අතර මුහුදු රළ සැරවීමත් උසින් වැඩිවීමත් නිසා නිවාස ගණනාවකට මුහුදු වතුර ගලා යාමෙන් හානි සිදුවීම හේතුවෙන් පදිංචිකරුවන් නිවාස හැර යාමේ අවදානමකට ලක්වී ඇත.

මුහුදු වෙරළ ආසන්නයෙ පදිංචි ධීවර පවුල් ගණනාවක් මේ අවදානමට මුහුණ පා සිටිති. නිවාස වලට ගලා එන මුහුදු ජලය නිවාස වටා ගලා යන තත්ත්වයක් උද්ගතව පවතී.

පසුගිය බ‍්‍රහස්පතින්දා පස්වරුවේ සිට මේ තත්ත්වය උද්ගතවූ බවත් අනතුරු දායක ත්තත්වය පිළිබදව වෙරළ සංරකෂණ දෙපාර්තමේන්තුවට හා අදාල වෙනත් රාජ්‍ය ආයතන වලට දැනුම් දුන්නත් ප‍්‍රයෝජනයක් නොවූ බව සමස්ත ලංකා ධීවර ජනතා වෘත්තීය සංගමයේ සභාපති අරුණ රොෂාන්ත ප‍්‍රනාන්දු මහතා සඳහන් කළේය.

කූඩු සමඟ ගල් ටිකක් ගෙනවිත් දී ඇතත් ඒවා මේ විනාශය වළක්වන්නට ප‍්‍රමාණවත් නැති බවත් පෝර්ට් සිටිය හා අධිවේගී මාර්ග සඳහා මුහුදු වැලි ඉවක් බවක් නැතිව ලබා ගැනීම නිසා මේ විනාශය සිදුව ඇතැයිද ප‍්‍රනාන්දු මහතා පැවසීය.