(නිමල කොඩිතුවක්කු)
 
බාහිර උපාධිය කප්පාදු කිරිමේ වැඩපිළිවලක ආණ්ඩුව නිරත වන බව  බාහිර උපාධි සුරැකීමේ සංවිධාන එකතුව කොළඹ දී මාධ්‍ය හමුවක් පවත්වමින් පැවැසූහ.

එම උත්සාහය වහා නතර කර ඉදිරි අයවැයෙන් සියලූම උපාදිධාරීන්ට වහාම රැකියා ලබා දෙන ලෙසට රජයෙන් ඉල්ලීමක් කරන බව එම සංවිධානයේ කැඳවුම්කරු මහේෂ් අඹේපිටිය මහතා පැවසීය.

බාහිර උපාධි සුරැකීමේ සංවිධාන එකතුව මරදාන පිහිටි සමාජය හා සාමුහික කේන්ද්‍රයේ අද (28) පැවත්වූ  මාධ්‍ය හමුවකට එක්වෙමින් ඒ මහතා  මේ බව පැවසීය.

එහිදී වැඩිදුරටත් අදහස් දැක්වූ මහේෂ් අඹේපිටිය මහතා මෙසේද කීය.

 ‘‘සියලූම උපාධිධාරීන්ට රැකියා ලබාදෙන  බවට පොරොන්දු වෙමින් මේ ආණ්ඩුව බලයට පත්වුණා. එහෙම පත්වෙච්ච ආණ්ඩුව අද දිගින් දිගටම සියලූම උපාධිධාරීන්ට රැකියා ලබා දීම මඟඅරිමින් සිටිනවා.

ප‍්‍රජාතන්ත‍්‍රවාදය සුරකෂිත කිරීමට පත්වු මේ ආණ්ඩුව අද දිගින් දිගටම බාහිර උපාධිධාරින්ගේ රැකියා අහිමි කරමින් සිටිනවා. රැකියා හිමිවූ උපාධිධාරීන්ට පවා අද වැටුප් වාර්තා පවා අහිමි කරමින් සිටිනවා. රැකියා නිර්දේශ වූ බාහිර උපාධිධාරීන් පවා එම රැකියා වලින් ඉවත් කිරිමේ උත්සාහයක මේ ආණ්ඩුව නිරත වෙමින් සිටිනවා. 

අද රැකියා විරහිත උපධිධාරින් 60,000 ක් ඉන්නවා. ඒ අයට රැකියා දෙන්න කිසිදු වැඩපිළිවෙළක් මේ ආණ්ඩුව සතුව නැහැ.

2016 වසරේ සිට මේ දක්වා බාහිර උපාධිය සඳහා සිසුන් බඳවා ගෙන නැහැ. බාහිර උපාධිධාරීන් සඳහා නියමිත දිනවල විභාග පවත්වා නැහැ. දිගින් දිගටම බාහිර උපාධිය කප්පාදු කිරීමේ වැඩපිළිවෙළක ආණ්ඩුව නිරත වෙමින් සිටිනවා.

සියලූම උපාධිධාරීන්ට රැකියා ලබාදිමේ වැඩපිළිවෙළක් ආණ්ඩුව කඩිනමින් සකස් කළ යුතුයි. උපාධිධාරීන්ට රැකියා ලබාදීමේ දී 35 වයස් සීමාව වහාම ඉවත් කළ යුතුයි. එහෙම නොකළොත් අපි මේ රජයට විරුද්ධව දැවැන්ත වැඩපිළිවෙළක් ක‍්‍රියාත්මක කරනවා යැයි ද ඔහු එහිදී පැවසීය.