(ඔගස්ටින් ප්‍රනාන්දු)

බීමතින් උල් පිහියක් රැගෙන සිය බිරිඳට හිරිහැර කිරිමට පැමිණ සිටිය දී අත්අඩංගුවට ගත් ප්‍රාදේශීය සභා මන්ත්‍රී නොවැම්බර් 1 වැනි දා දක්වා රක්ෂිත බන්ධනාගාරගත කිරීමට හලාවත අතිරේක දිසා විනිසුරු හා මහේස්ත්‍රාත් රඛිත පී. අබේසිංහ මහතා අද (22) නියෝග කළේය.

මෙසේ රක්ෂිත බන්ධනාගාර ගත කරනු ලැබුයේ හලාවත ප්‍රාදේශීය සභාවේ ශ්‍රී ලංකා පොදුජන පක්ෂයේ මන්ත්‍රී මුගුණුවටවන මහගම පදිංචි රන් කිරණ පේඩිගේ වසන්ත තිජට් වික්‍රමසිංහ යන අයයි.

සැකකරු අධික ලෙසින් මත්පැන් පානය කර උල් පිහියක් ගෙන හලාවත දිස්ත්‍රික් මහ රෝහලේ සුළු සේවිකාවක ලෙසින් සේවය කරන සිය බිරිඳ හමුවට පැමිණ ඇයට පිහියෙන් අනින්න තැත් කරන අවස්ථාවේ දී රෝහල් පරිශ්‍රය තුළදී ආරක්ෂකයින් විසින් අල්ලා පොලිසියට බාර දි තිබිණි.

සැකකරු බීමතින් උල් ආයුධයක් අතැතිව රාජ්‍ය ආයතනයකට ඇතුළු වි සිය බිරිඳට අනින්නට තැත් කිරීමේ චෝදනාවට අධිකරණය හමුවට ඉදිරිපත් කෙරිණි. ඒ අනුව හලාවත අතිරේක දිසා විනිසුරු හා මහේස්ත්‍රාත් රඛිත පී. අබේසිංහ මහතා මන්ත්‍රීවරයාව රක්ෂිත බන්ධනාගාරගත කිරීමට නියෝග කළේය.