(නිමන්ති රණසිංහ)


ශී‍්‍ර ලංකා මහ බැංකුව විසින් බැඳුම්කර නිකුතුවේදී අක‍්‍රමිකතාවක් සිදුවීම සහ රජයට පාඩු සිදුකළැයි කියන සිද්ධියට අදාළව රක්ෂිත බන්ධනාගාර ගත කර සිටි පර්පෙචුවෙල් ටෙ‍්‍රෂරීස්  සමාගම් සමූහයේ අධ්‍යක්ෂක අර්ජුන් අලෝසියස් යන අයගේ බිරිඳ සහ වැඩිමල් දියණිය මානසික ආතතීයෙන් පෙලීම හේතුවෙන් එය සුවිශේෂී කරුණක් ලෙසට සලකමින් සැකකරුට ඇප ලබා දෙන ලෙස ජනාධිපති නිතීඥ අනිල් සිල්වා මහතා අද (25) අධිකරණයෙන් ඉල්ලීමක් කළේය.


ජනාධිපති නිතීඥවරයා විසින් මෙම ඉල්ලීම සිදුකරනු ලැබේ කොළඹ කොටුව මහේස්ත‍්‍රාත් ලංකා ජයරත්න මෙනෙවිය ඉදිරියේ පැවැත්වූ සිද්ධියට අදාළ නඩුව යළි කැඳවූ අවස්ථාවේදීය.


එමෙන්ම ඒ සම්බන්ධයෙන් නිතිපතිවරයාගේ අදහස ලබන නඩුවාරයේදී ඉදිරිපත් කරන ලෙසට දැනුම් දෙමින් අධිකරණය සැකකරුවන් දෙදෙනා වූ පර්පෙචුවෙල් ටෙ‍්‍රෂරීස්  සමාගම් සමූහයේ අධ්‍යක්ෂක අර්ජුන් අලෝසියස් සහ එහි ප‍්‍රධාන විධායක නිලධාරී කසුන් ඖෂධී පලිසේන යන අයවලූන් ලබන 08 වැනිදා තෙක් තවදුරටත් රක්ෂිත බන්ධනාගාර ගත කිරිමට නියෝග කළේය.


මෙම සැකකරුවන් සම්බන්ධයෙන් ඇප ඉල්ලීම කොළඹ මහෙස්ත්‍රාත් අධිකරණය මගින් ප‍්‍රතික්ෂේප කරනු ලැබූ පසු කොළඹ මහාධිකරණය මෙන්ම අභියාචනාධිකරණයෙන් ද එම ඇප ප‍්‍රතික්ෂේප කරනු ලැබීය.