(නිමල් ජයරත්න)
 
පොළොන්නරුව ජල ගැලුම් නිම්න ජාතික වනෝද්‍යානයට නීති විරෝධීව ඇතුළු වී, පරිසරයට හානි වන ආකාරයට කුඹුරු වගා කළ පුද්ගලයින් 149 දෙනෙකු ඉන් වහා ඉවත් කරන ලෙස පොළොන්නරුව ප‍්‍රධාන මහේස්ත‍්‍රාත් අසංක අසේල ද සිල්වා මහතා අද(01) පොළොන්නරුව අඩවි ආරක්ෂක නිලධාරීන්ට නියෝග කළේය.
 
ජල ගැලුම් නිම්න ජාතික වනෝද්‍යානයේ ඇති කුඹුක්, මී,  පලු, වීර ඇතුළු වටිනා ශාක විනාශ කරමින් එහි සිටින වන සතුන්ටද හානිවන අයුරින් කලක සිට වී වගා කළ මෙම පුද්ගලයන්ට එරෙහිව රජයේ ඉඩම් සන්තකයේ ආපසු පවරා ගැනීම පනත යටතේ පොළොන්නරුව අඩවි ආරක්ෂක කාර්යාලය මගින් අධිකරණයේ නඩු ගොනු කර තිබිණි.
 
එම පනත යටතේ අදාළ වනෝද්‍යානයේ නීති විරෝධීව වී වගා කළ 219 දෙනෙකු සඳහා නඩු පවරා තිබූ අතර මීට පෙර එයින් පුද්ගලයන් 70දෙනෙකු අධිකරණ නියෝග මත පොළොන්නරුව වන ජීවි නිලධාරීන් විසින් ඉවත් කරන ලදී.
 
මෙම පුද්ගලයන් වනෝද්‍යානයේ අක්කර 5000 කට ආසන්න බිම් ප‍්‍රමාණයක් විනාශ කර තිබූ අතර වන සතුන්ගේ ජීවිතවලට දැඩි තර්ජන එල්ල වී තිබූ බවද පොළොන්නරුව වනජීවි කාර්යාලයේ උසස් නිලධාරියෙක් පැවසීය.
 
පොළොන්නරුව වනජීවි සහකාර අධ්‍යක්ෂ ඩබ්ලිව්. ඩී. එම්. ජේ. වික‍්‍රමසිංහ මහතාගේ උපදෙස් පරිදි සී. ඩී. සුනිල් ශාන්ත,  එස්. ඒ. වික‍්‍රමරත්න, සී. ඒ. වනසිංහ, එච්. පී. එස්. තිලකරත්න යන අඩවි ආරක්ෂක නිලධාරීන් විසින් එම පුද්ගලයන්ට විරුද්ධව පොළොන්නරුව අධිකරණයේ නඩු ගොනුකර තිබුණි.
 
ඒ අනුව අධිකරණ නියෝගය අනුව  එම පුද්ගලයින් 149 දෙනා එම භූමියෙන් ඉවත් කරන බව පොළොන්නරුව අඩවි ආරක්ෂක කාර්යාලයේ උසස් නිලධාරියෙක් සඳහන් කළේය.