(තිළිණි ද සිල්වා  සහ  රංජන් කටුගම්පොළ)
 
පළාත් සභා මැතිවරණය වහාම පැවත්වීමට අදාළ පියවර ගැනීමට මැතිවරණ කොමිසමට නියෝග කරන රීට් ආඥාවක් නිකුත් කරන ලෙස ඉල්ලා සත්‍ය ගවේෂකයෝ සංවිධානයේ සාමාජිකයින් පිරිසක් ශ්‍රේෂ්ඨාධිකරණය හමුවේ අද (18) රීට් පෙත්සමක් ගොනු කර ඇත.
 
සත්‍ය ගවේෂකයෝ සංවිධානයේ සාමාජිකයින් වන නීතීඥ දිනේෂ් සඳරුවන් ජයවීර මහතා ඇතුළු සාමාජිකයන් නමදෙනෙකු විසින් ගොනු කර ඇති මෙම පෙත්සමෙහි වගඋත්තරකරුවන් ලෙස මැතිවරණ කොමිසමේ සභාපති ඇතුළු සාමාජිකයින් නම් කර තිබේ.
 
නීතීඥ ප්‍රේමනාත් සී.දොළවත්ත මහතා විසින් ගොනු කර ඇති පෙත්සමේ මෙසේද සඳහන් වේ.
 
පෙත්සම්කරුවෝ ඡන්දදායකයෝ වෙති. පළාත් සභා පනතේ 154 (ඉ) අනුව වසර පහක කාලයක් ඉක්ම ගිය පසු එම පළාත් සභාව විසුරුවා ගියා සේ සැලකේ. එම පනතෙහි 10 වැනි වගන්තිය අනුව අදාළ කාලය ඉක්ම ගොස් සති 4ක කාලයක් ඇතුළත මැතිවරණයක් පැවැත්වීමේ අදහස පිළිබඳ දැන්වීමක් ප්‍රකාශ කිරීමේ වගකීම මැතිවරණ කොමිසම සතුවේ. එහෙත් එම වගකීම මැතිවරණ කොමිෂන් සභාව විසින් පැහැර හැර ඇත.                                            
එබැවින් අදාළ වගඋත්තරකරුවන්ට නොතීසි නිකුත් කරන ලෙසද, පළාත් සභා මැතිවරණය පැවැත්වීමට අදාළ පියවර ගැනීම නියෝග කරමින් රීට් ආඥාවක් නිකුත් කරන ලෙසද පෙත්සම්කරු සිය පෙත්සමින් ඉල්ලා ඇත.