(නිමල කොඩිතුවක්කු)
 
දැනට වෙළඳපොළේ පවතින පොහොර හිඟය ඔක්තෝබර් මාසයේ මුල් සතිය පමණ වනවිට අවසන් වනු ඇතැයිද ජාතික පොහොර ලේකම් කාර්යාලයේ අධ්‍යක්ෂ මහේෂ් ගම්මන්පිල මහතා අද(08) ලංකාදීපයට පැවසීය.
 
කොරෝනා වසංගතයෙන් පසු වෙළඳපොළේ උග්‍ර පොහොර හිඟයක් පවතින බවට ගොවීන් කරන චෝදනා සම්බන්ධයෙන් කළ විමසුමකදී ඒ මහතා මේ බව සඳහන් කළේය.
 
ඔහු වැඩිදුරටත් පැවසුවේ පොහොර නිකුත් කිරීම සම්බන්ධයෙන් සැලැස්ම සකස් කර ඒවා නිකුත් කිරීමට අවශ්‍ය නිර්දේශ  පොහොර සමාගම් වෙත ලබාදෙන බවයි.
 
පොහොර හිඟය හේතුවෙන් තේ, පොල්, රබර්, ඇතුලු වැවිලි භෝග සහ  එළවළු ආදී භෝග වගාකරුවෝ දැඩි දුෂ්කරතාවයකට පත්ව සිටිති. බිම් සකස් කර බීජ සිටුවා තිබියදී පොහොර නිකුත් නොකිරීම  හේතුවෙන් වගාකටයුතු සියල්ලම අඩපන වී ඇතැයිද ගොවීහු පෙන්වා දෙති.

පොහොර නිකුත් කරන පෞද්ගලික  සමාගම්වල අවශ්‍ය ප්‍රමාණයට පොහොර ගොඩ ගසා ඇතත් පොහොර ලේකම් කාර්යාලයේ නිර්දේශ ලැබෙන තෙක් එම පොහොර තොග නිකුත් කිරීමට එම සමාගම් පියවර නොගන්නා බවටත් ඔවුහු සඳහන් කරති.