(ඩයනා උදයංගනී)

පාස්කු ඉරුදින එල්ල වූ ත්‍රස්ත ප්‍රහාරයේ වින්දිතයන්ට සාධාරණය ඉටුකරදෙන්නැයි ඉල්ලමින් පාස්කු ප්‍රහාර වින්දිතයන්ගේ ගෝලීය සංසදය මගින් සංවිධානය කළ විශේෂ දේව යැදුමක් සහ සත්‍යග්‍රහයක් වතිකානයේ ශුද්ධ වූ පේදුරු බැසිලිකා පරිශ්‍රය අසලදී පැවැත්විණි.

මෙම ප්‍රහාරයේ වින්දිතයන්ට සාධාරණය ඉටුකරගැනීම වෙනුවෙන් ජාත්‍යන්තර සහයෝගය ලබාගැනීමට මැල්කම් කාදිනල් රංජිත් කොළඹ අගරදගුරුතුමන් ගෙන යන වැඩපිළිවෙලට සහය දැක්වීමක් ලෙස මෙම යාඥාව සංවිධානය කළ බව පාස්කු ප්‍රහාර වින්දිතයන්ගේ ගෝලීය සංසදය පවසයි.

ඕස්ට්‍රේලියාව, කැනඩාව, ප්‍රංශය, ඉතාලිය ආදී රටවල පදිංචිව සිටින ශ්‍රී ලාංකික කිතුණු බැතිමතුන් විශාල පිරිසක් මෙම යාඥාවට එක්ව සිටියහ.

ඔවුහු පාස්කු ප්‍රහාරයෙන් මියගිය අයගේ ඡායාරූප මෙන්ම සාධාරණය ඉටුකරදෙන සඳහන් පුවරු ආදිය ප්‍රදර්ශනය කරමින් මෙම දේව යාඥාවෙහි නිරතව සිටියහ.