(රවින්ද්‍ර ප්‍රභාත් නෙත්තසිංහ )
 
වාරියපොල පොලිසියට පැමිණ පොලිස් පරීක්ෂකවරයකුට තර්ජනය කළ   බවට චෝදනා ලබා සිටි හිමිනම අද  (25) උදෑසන නීතීඥවරුන් දෙදෙනෙකු මාර්ගයෙන් පොලිසියට බාර වූ බව  වාරියපොල පොලිසියේ ස්ථානාධිපති ප්‍රධාන පොලිස් පරීක්ෂක නිලන්ත බණ්ඩාර මහතා පැවසීය.
 
මේ සම්බන්ධව අදාල ප්‍රකාශයන් සටහන් කර ගැනීමෙන් අනතුරුව හිමිනම අද (25)  වාරියපොල මහේස්ත්‍රාත් අධිකරණයට ඉදිරිපත් කිරීමට නියමිතය.
 
පොලිස් පරීක්ෂකවරවරයාට පහර දීම ඇතුලු චෝදනා සම්බන්ධයෙන් තවත් පුද්ගලයින් දෙදෙනෙකු පොලිසිය විසින් සොයමින් සිටින බවද ස්ථානාධිපතිවරයා පැවසීය .
 
පසුගිය දින කීපය තුළ මෙම සිද්ධිය සමාජ මාධ්‍ය හරහා ප්‍රසිද්ධියට පත්වීම හේතුවෙන් ඒ පිළිබඳව බොහෝ දෙනාගේ අවධානය යොමුව තිබිණි.
 
පසුගිය 19 වැනිදා නිතී විරෝධි මත්පැන් ජාවාරම්කරුවකු  වැටලීමට ගිය අවස්ථාවේදී එම ක්‍රියාව නොකරන ලෙස දුරකතන ඔස්සේ මෙම හිමි නම සහ මත්පැන් ජාවාරම්කරුවන් පොලිස් පරීක්ෂකවරයාට තර්ජනය කර තිබිණි.
 
අනතුරුව පසුදින එනම් ඉකුත් 20 වැනිදා හිමි නම ඇතුළු මත්පැන් ජාවාරම්කරුවන් වාරියපොල පොලසියට පැමිණ පොලිස් පරීක්ෂකවරයාට බැන තර්ජනය කර පහර දී තිබිණි.
 
සිද්ධිය සම්බන්ධව දින කිහිපයකට පෙර පුද්ගලයින් දෙදනකු අත්අඩංගුවට ගෙන රක්ෂිත බන්ධනාගාරගත කර ඇත. හිමි නම අතුළු තවත් කිහිප දෙනකු අත්අඩංගුවට ගැනීම සඳහා දින  6 ක් තිස්සේ පරීක්ෂණ පැවැත්විණි.
 
පොලිස් පරීක්ෂකවරයා අද (25) ප්‍රතිකාර ලබා නිකවැරටිය රෝහ‍‍ලෙන් පිටව ගොස් ඇති බව  සිද්ධිය සම්බන්ධයෙන් පරීක්ෂණ පවත්වන වාරියපොල පොලීසිය සඳහන් කළේය.