තරිඳු ජයවර්ධන
 

ජාතික පොලිස් කොමිෂන් සභාවේ මාර්ගෝපදේශ පරිදි උප පොලිස් පරීක්ෂකගෙන් පහළ නිලයන්වල පොලිස් නිලධාරීන් 2891 දෙනකුට අදාල උසස්වීම් නියෝග පොලිස්පතිවරයා අද නිකුත් කළේය.
 
මෙම උසස්වීම් 2018 මැයි 31 වැනි දා සිට ක්‍රියාත්මක වන පරිදි පෙරදාතම කර තිබේ.
 
උසස්වීම් ලැබූවන් අතර පොලිස් කොස්තාපල් රියදුරන්, පොලිස් කොස්තාපල්වරුන්, කාත්තා පොලිස් කොස්තාපල්වරුන්, පොලිස් සැරයන්වරුන්, කාන්තා පොලිස් සැරයන්වරුන් සහ පොලිස් සැරයන් රියදුරන් සිටින බව පොලිස් මූලස්ථානය කියයි.
 
උසස්වීම් ලැබූවන්ගෙන් 60කට ආසන්න පිරිසකට එරෙහිව පවතින විනය පරීක්ෂණ හෝ නඩු කටයුතු නිසා ඔවුන්ගේ නම් පොරොත්තු ලේඛන ගත කර ඇතැයි ද පොලිසිය පවසයි.
 
පොලිසියේ පහළ නිලධාරීන්ට උසස්වීම් ලබා නොදීම සම්බන්ධයෙන් ‘පොලිසියේ අවනඩුව මැයෙන්‘ ලංකාදීප සත්‍ය ගවේෂණ විශේෂාංගයෙන් ද හළිදරව්වක් කර තිබිණි.
 
මෙලෙස උසස්වීම් ලබා දුන්නත නියමත සේවා කාලය සම්පූර්ණ කළ උප පොලිස් පරීක්ෂකවරුන්ට අදාල උසස්වීම් නියෝග මේ වන තෙක් නිකුත් කර නැත. එමෙන්ම උසස්වීම් ලබා දීමේදී අසාධාරණයට ලක්වූ පොලිස් නිලධාරීන්ද සිටින බවත්, ඔවුන් ඒ සම්බන්ධයෙන් ජාතික පොලිස් කොමිෂන් සභාවට පැමිණිලි කරනු ඇති බවත් පොලිස් ආරංචි මාර්ග පවසයි.