(පුෂ්පකුමාර මල්ලවආරච්චි)

පූගොඩ පොලිස් වසමේ වෙළෙඳසලක්  කොල්ල කා  පලා යමින් සිටි කොල්ල කල්ලිය ගමන් ගත් වෑන් රියකට මීරිගම පොලිස් නිලධාරීන් අද(13) පමණ වෙඩි ප්‍රහාරයක් එල්ල කර ඇතැයි පොලිසිය කියයි.

වෙඩි වැදුණු වෑන් රිය නොනවත්වා ම පලා ගොස් ඇති අතර එම රිය අතුරු මාර්ගයක සඟවා ඇතැයි සැක කර හෙයින් පොලිස් කණ්ඩායම් සෝදිසි මෙහෙයුම ද ආරම්භ කර ඇත.

පූගොඩ නගරයේ වෙළඳසැලක් කොල්ල කන බවට ලැබුණු තොරතුරක් මත එම පොලිසියේ කණ්ඩායමක් එම ස්ථානයට ගිය අවස්ථාවේ කොල්ල  කල්ලිය  වෑන් රියෙන් පලා ගොස් ඇත. පොලිස් නිලධාරින් පලා යන වෑන් රිය සොයමින් පරීක්ෂණ ආරම්භ කර ඇති අතර, ප්‍රදේශයේ සියලූ පොලිස් ස්ථාන දැනුවත් කිරීමට කිරීමට ද පියවර ගෙන තිබේ. ඒ අනුව පොලිස් පිරිස් විමසිල්ලෙන් සිටිය දී ගිරිඋල්ල දෙසට ගමන් ගත් වෑන් රථය නතර කරන ලෙසට  මීරිගම   ඩී එස් හන්දිය අසල දී මාර්ග බාධක රාජකාරියේ යෙදී සිටි පොලිස් නිලධාරීන් නියෝග කර ඇත.

පොලිස් අණ නොතකා පලායාමට තැත් කළ වෑන් රියට පොලීසිය මෙහිදී වෙඩි ප්‍රහාරයක් එල්ල කර ඇතත්  ඔවුන් පලා ගොස් ඇතැයි පොලිසිය කියයි.

මෙම වෑන් රථය ගිරිවුල්ල දෙසට ගමන් කර නැති බවට පොලිස් පරීක්ෂණවල දී හෙළි වී ඇත. එම හේතුව නිසා මෙම රිය ප්‍රදේශයේ කිසියම් අතුරු මාර්ගයක ගමන් කර සඟවා තබා ඇත් දැයි  සැක කරන බවද පොලිසිය පවසයි