(ආනන්ද ඉ ජයකොඩි)

සමගි ජන බලවේගයේ සංවිධායකත්වයෙන් හයිඩ් පිටියේ දී හෙට පැවැත්වෙන උද්ඝෝෂණයට ජනයා රැගෙන යාම තහනම් කරන ලෙසට පොලීසි හයකින් කරන ලද ඉල්ලීම් හයක් අත්තනගල්ල අංක 01 ප්‍රධාන මහේස්ත්‍රාත් නන්දන අමරසිංහ මහතා අද සවස ප්‍රතික්ෂේප කළේය.

නිට්ටඹුව, නාල්ල, පල්ලෙවෙල,මීරිගම දංඕවිට හා වේයන්ගොඩ යන පොලීසි කළ ඉල්ලීම් එසේ ප්‍රතික්ෂේප විය.

එම පොලීසි හය වෙනුවෙන්ම අධිකරණයේ අවසරය පරිදි නිට්ටඹුව පොලීසියේ නඩු මෙහෙයුම් අංශයේ ස්ථානාධිපති ප්‍රධාන පොලිස් පරීක්ෂක ජී.ඩබ්ලිව්.ඇල්.රවීන්ද්‍ර මහතා ඊට අදාලව කරනු දක්වමින් සමගි ජන බලවේගය කොළඹ හයිඩ් පිටියේ දී හෙට උද්ඝෝෂණයක් හා රැළියක් පවත්වන බව කියා සිටියේය.

එම උද්ඝෝෂණ රැළිය සදහා නිට්ටඹුව, නාල්ල, පල්ලෙවෙල, මීරිගම , දංඕවිට හා වේයන්ගොඩ යන පොලිස් වසම්වලින් දහස් ගණනක ජනතාවක් රැගෙන යාමට සංවිධානය කොට ඇති බවට බුද්ධි තොරතුරු ලැබී ඇති බව ප්‍රධාන පොලිස් පරීක්ෂකවරයා අධිකරණය හමුවේ කීයා සිටියේය.

කොළඹ බලා යාමට දහස් ගණන් ජනයා ඒකරාශි වුවහොත් ‍මහජන සෞඛ්‍යයට දැඩි තර්ජනයක් එල්ල විය හැකි බවත් අනෙක් පැත්තෙන් එම නගරවලද දැඩිසේ නොසන්සුන් කාරී තත්වයක් උදා වීමට බොහෝ දුරට ඉඩ ඇති බවත් ප්‍රධාන පොලිස් පරීක්ෂකවරයා අධිකරණ හමුවේ කරුණු දැක්වීය.

එම උද්ඝෝෂණ රැළියේදී සමගි ජන බලවේගයේ නායක සජිත් ප්‍රේමදාස මහතාට අනතුරක් කිරීමට සැලසුම් කොට ඇති බවට ප්‍රධාන පොලිස් පරීක්ෂක වරයකු පැමිණිල්ලක් කොට ඇති බවත් මේ කරුණු සළකා බලා ජනයා කොළඹට රැගෙන යාම තහනම් කරන මෙන් ඉල්ලා සිටින බවද ප්‍රධාන පොලිස් පරීක්ෂක වරයා වැඩිදුරටත් කරුණු දක්වමින් කියා සිටියේය.

මෙහිදී ප්‍රධාන මහේස්ත්‍රාත් නන්දන අමරසිංහ මහතා කරුණු දක්වමින් මෙවැනි ඉල්ලීම් කළ යුත්තේ නීතිපති වරයාගේ උපදෙස් අනුව බවත් මේ එකම ඉල්ලීමකට වත් නීතිපතිවරයා උපදෙස් ලබා දී නැති බවත් අනෙක් පැත්තෙන් ඔය උද්ඝෝෂණය පවත්වන්නේ මෙම අධිකරණ බල ප්‍රදේශයේ නොවන බව කියා සිටියේය.