ඉන්දිකා රාමනායක

 
පුරවැසි බලය සංවිධානයේ  නියෝජිත   සමන් රත්නපි‍්‍රය මහතා   මාධ්‍ය සාකච්ඡාවක් පවත්වමින් රට තුළ  ජාතික ආරක්ෂාවට තර්ජනයක් වන අන්දමේ  සහ අරගලයක් නිර්මාණය වන අන්දමේ  ප‍්‍රකාශ නිකුත් කළ බව කියන  සිද්ධියන් සම්බන්ධයෙන් පොලිස් විශේෂ විමර්ශන ඒකකය පරීක්ෂණ ආරම්භ කර ඇති බව පොලිස් මුලස්ථානය කියයි.


ජාතික හෙළ උරුමයේ  ප‍්‍රධාන සංවිධායක  උපුල් නිශාන්ත මහතා   මෙම සිද්ධිය සම්බන්ධයෙන්  ඉකුත් (9) වැනි දා පොලිස් මුලස්ථානයට පැමිණිල්ලක් ඉදිරිපත් කර තිබු පැමිණිල්ලකට අනුව  පරීක්ෂණ පැවැත්වීම  සඳහා පොලිස්පති පුජිත් ජයසුන්දර මහතා විසින් එය  විශේෂ විමර්ශන ඒකකය වෙත යොමු කළ බව පොලිස්  මාධ්‍ය ප‍්‍රකාශක පොලිස් අධිකාරි රුවන් ගුණසේකර මහතා  පැවසීය.


මෙම සිද්ධිය සම්බන්ධයෙන්  විශේෂ විමර්ශන ඒකකය  ඊයේ (10) දිනයේ දී  සිද්ධිය සම්බන්ධයෙන් පැමිණිලිකරුගෙන් දීර්ඝ ප‍්‍රකාශයක්  ලබා ගෙන  අලූත්කඬේ   අංක 4 අධිකරණය වෙත  නඩු අංක බී/ 3816  යටතේ   සිවිල්  හා දේශපාලන  අයිතිවාසිකම්  පිළිබඳ ජාත්ත්‍යන්තර  සම්මුතිය පනත හා  දණ්ඩ නීති සංග‍්‍රහය යටතේ  කරුණු  වාර්තා කළ බව රුවන් ගුණසේකර මහතා කියා සිටියේය.


ඉකුත් 6 වැනි දා පැවැත් වු මෙම ප‍්‍රවෘත්ති සාකච්ඡාව සම්බන්ධයෙන්  රූපවාහිනි නාලිකාවල  සංස්කරණය නොකළ  දර්ශන ලබා ගැනීමට  විශේෂ විමර්ශන ඒකකය අධිකරණ නියෝගයක් ලබාගෙන ඇති බවද පොලිස් මාධ්‍ය ප්‍රකාශකවරයා  කියා සිටියේය.