(අනීෂා මානගේ)

පරෙවියන් සම්බන්ධයෙන් කුඩා දරුවන් දෙදෙනකු අතර ඇති වූ ආරවුලක් දුරදිග යාම හේතුවෙන් දරුවන් දෙදෙනාගේ ඥාතීන් අතර සිදුවූ පහරදීමක් අතරතුර ගල් කටස් වර්ගයේ ගිනි අවියක්, කාන්තාවන්සිව් දෙනෙකු ඇතුළු 13 දෙනෙකු අත්අඩංගුවට ගත් බව තංගල්ල මූලස්ථාන පොලිසිය කියයි.

මෙලෙස අත්අඩංගුවට පත්ව ඇත්තේ තංගල්ල නෙටොල්පිටිය බෙලිවලගොඩ ප්‍රදේශයේ පදිංචිකරුවෝ 13 දෙනෙකි.

දැනට මාස කිහිපයකට පමණ ඉහතදී පරෙවියන් සම්බන්ධයෙන් කුඩා දරුවන් දෙදෙනකු අතර ආරවුලක් ඇති වී තිබූ අතර මෙම ගැටළුව දරුවන්ගේ ඥාතීන් අතරට ද යාම නිසා ඔවුන් දෙපිරිස ද දිගින් දිගටම ආරවුල් ඇති කර ගෙන ඇතැයි පොලිසිය පවසයි.

ඔවුන් දෙපිරිස අතර නෙටොල්පිටිය බෙලිවලගොඩ ප්‍රදේශයේදී ගැටුමක් හටගෙන ඇති අතර එහිදී එක් දරුවකුගේ පියෙකු ටී 56 වර්ගයේ පතුරොම් යොදන ගල්කටස් වර්ගයේ  ගිනි අවියක් රැගෙන අනෙක් පාර්ශවය දෙසට වෙඩි තැබීමට උත්සාහ කර ඇතැයි පොලිසිය කියයි.

එහිදී අනෙක් පාර්ශවය විසින් ගිනිඅවිය උදුරාගෙන එය රැගෙන ගොස් තංගල්ල මූලස්ථාන පොලිසියට බාර දී තිබේ. එම අවස්ථාවේදී දෙපිරිස අතර පහරදීමක් ද සිදුව ඇතැයි පොලිසිය කියයි.

සිද්ධිය සම්බන්ධයෙන් පරීක්ෂණ සිදුකළ තංගල්ල මූලස්ථාන පොලිස් ස්ථානයේ නිලධාරීහු කාන්තාවන් සිව් දෙනෙකු ඇතුළු 13 දෙනකු අත්අඩංගුවට ගත්හ. මෙම සිද්ධියට සම්බන්ධ යැයි කියන තවත් 5 දෙනෙකු අත්අඩංගුවට ගැනීමට පොලිසිය පරීක්ෂණ පවත්වයි.