(නවරත්න සමරතුංග)

පුරාවිද්‍යා රක්ෂිතයකට ඇතුළු වී නා ගස් කපා ට්‍රැක්ටරයකින් ප්‍රවාහනය කිරීමේ චෝදනා යටතේ බක්කිඇල්ල පොලීසිය මගින් අත්අඩංගුවට ගෙන අධිකරණයට ඉදිරිපත් කළ විත්තිකරුවන් 5දෙනෙකු සැප්තැම්බර් 17 දින දක්වා රිමාන්ඩ් භාරයේ තබන ලෙස අම්පාර ප්‍රධාන මහේස්ත්‍රාත් අසංකා හෙට්ටිවත්ත මහත්මිය නියෝග කළාය.
 
අම්පාර ප්‍රියන්ගල ප්‍රදේශයේ පදිංචිකරුවන් වන අත්තනායක මුදියන්සෙලාගේ අජිත් කුමාර, වර්ණකුල සූරියලාගේ අනුර, කොක්අඩ්චෝලේ පදිංචිකරුවන් වන සින්නතම්බි උදය කුමාර්, කනගරත්නම් ජෙයකරන්(රියැදුරු) සහ රාමලිංගම් කුරුකුලසිංහම් යන පස්දෙනා මෙසේ රිමාන්ඩ් කෙරිණි.
 
බක්කිඇල්ල පොලිස් වසමට අයත් රජගලතැන්න නාඋයන පුරාවිද්‍යා රක්ෂිතයේ නාගස් කපන බවට ලැබුණ බුද්ධි තොරතුරක් හා පුරාවිද්‍යා කාර්යාලයේ පැමිණිල්ලකට අනුව වැටලීම කළ බව බක්කිඇල්ල පොලීසිය බී/03/20 වාර්තාවෙන් අධිකරණයට කරුණු දැක්වීය.
 
මෙම සැකකරුවන් විශාල ප්‍රමාණායේ නා ගසක් කපා ට්‍රැක්ටරයකින් කොක්අඩිචෝල ප්‍රදේශයේ හින්දු කෝවිලකට රැගෙන ගොස් ඇති බවද විමර්ශනයේදී අනාවරණය වී ඇත.
 
සැකකරුවන්ගෙන් ප්‍රකාශ ලබාගත් බවත් එහිදී බක්කිඇල්ල වසමෙන් සැකකරුවන් දෙදෙනෙකු සහ කොක්අඩිචෝල ප්‍රදේශයෙන් තවත් සැකකරුවන් තිදෙනෙකු ඇතුළු මෙම 5දෙනා අත් අඩංගුවට ගෙන ඇති බවද බක්කිඇල්ල පොලීසියේ නඩු මෙහෙයුම් අංශයේ පොලිස් කොස්තාපල් චන්දන මහතා  අධිකරණයට පැවසීය.