(ඩයනා උදයංගනී)

දිවයිනේ ප්‍රදේශ ගණ්නාවකට අද (11) දහවල් කාලයේදී දැඩි උණුසුම් කාලගුණ තත්ත්වයක් පවතිනු ඇතැයි කාලගුණ විද්‍යා දෙපාර්තමේන්තුව පවසයි.

වයඹ සහ උතුරුමැද පළාත්වලත්, මන්නාරම, වවුනියාව, ගම්පහ සහ මොණරාගල දිස්ත්‍රික්කවලත් මෙලෙස වැඩි උණුසුමක් පවතිනු ඇතැයි කාලගුණ විද්‍යා දෙපාර්තමේන්තුවේ ප්‍රකාශකයෙක් පැවසීය.

එම ප්‍රදේශවල ජනතාව අධික වෙහෙසකාරී කටයුතුවලින් වැළකී සිටීමත්, ප්‍රමාණවත් ලෙස ජලය පානයකිරීම හා සෙවණ ඇති ස්ථානවල විවේක ගැනීමත් සුදුසු බව ඔහු සඳහන් කළේය.

මීට අමතරව ඉදිරි දිනවලදී දිවයිනේ බොහෝ ප්‍රදේශවල සවස් කාලයේ හෝ රාත්‍රී කාලයේදී වැසි හෝ ගිගුරුම් සහිත වැසි ඇතිවන බව එම ප්‍රකාශකයා සදහන් කළේය.