(ඩයනා උදයංගනී)

දිවයිනේ ප්‍රදේශ කිහිපයකට හෙට (05) දිනයේදී වැසි ඇතිවිය හැකි බව කාලගුණ විද්‍යා දෙපාර්තමේන්තුව පවසයි.

ඒ අනුව මධ්‍යම පළාතේත්, රත්නපුර, ගාල්ල, මාතර, හම්බන්තොට සහ මොණරාගල දිස්ත්‍රික්කවලත් ඇතැම් ස්ථානයන්හි පස්වරු 2.00 න් පසු වැසි හෝ ගිගුරුම් සහිත වැසි ඇතිවිය හැකි බව එම දෙපාර්තමේන්තුවේ ප්‍රකාශකයෙක් පැවසීය.

අනෙකුත් ප්‍රදේශවල වැසි රහිත කාලගුණයක් පවතින බවද එම ප්‍රකාශකයා සඳහන් කළේය.

බස්නාහිර සහ සබරගමුව පළාත්වලත් නුවරඑළිය දිස්ත්‍රික්කයේත් ඇතැම් ස්ථානවල උදෑසන කාලයේ මීදුම් තත්ත්වයක් ඇතිවිය හැකි බව ද හෙතෙම කීවේය.

මේ දිනවල ශ්‍රී ලංකාවට බලපා ඇති ඊසාන දිග මෝසමේ බලපෑමෙන් මෙම වැසි ඇතිවන බව ද ඔහු සඳහන් කළේය.

අන්තර් මෝසම ද මෙම මස අවසන් සතියේදී පමණ සක්‍රීය වනු ඇතැයි කී එම ප්‍රකාශකයා ඉන්පසු දිවයිනේ බොහෝ ප්‍රදේශවලට සවස් කාලයේ වැසි ඇතිවනු ඇතැයි ද ප්‍රකාශ කළේය.

මීට අමතරව වයඹ, බස්නාහිර, සබරගමුව සහ දකුණු පළාත්වලත්, මොණරාගල දිස්ත්‍රික්කයේත් හෙට දිනයේ ද දැඩි උණුසුමක් පවතිනු ඇතැයි කාලගුණ විද්‍යා දෙපාර්තමේන්තුව පවසයි.

මේ අතර අද (04) පෙරවරු 8.30 න් අවසන් වූ පැය 24 කාලයේදී උපරිම උෂ්ණත්වය ලෙස සෙල්සියස් අංශක 37.6 ක උෂ්ණත්වයක් රත්නපුර දිස්ත්‍රික්කයෙන් වාර්තා වී ඇති අතර වැඩිම වර්ෂාපතනය ලෙස මිලිමීටර 23 ක වර්ෂාපතනයක් වාර්තා වී ඇත්තේ ද රත්නපුර දිස්ත්‍රික්කයේ සමනළවැව ප්‍රදේශයෙනි.