(ඔගස්ටින් ප්‍රනාන්දු)

පුත්තලම දිස්ත්‍රික් එක්සත් ජාතික පක්ෂ පාර්ලිමේන්තු මන්ත්‍රී වලිමුනි මෙන්ඩිස් ශාන්ත සිසිර කුමාර අබේසේකර නොවැම්බර්  5 වැනිදා දක්වා රක්ෂිත බන්ධකාගාර ගත කිරිමට හලාවත මහාධිකරණ විනිසුරු වයි.ප්‍රනාන්දු මෙනෙවිය අද ( 17 ) නියෝග කළාය.

හලාවත මහාධිකරණය විසින් නියම කර තිබු ඇප කොන්දේසි උල්ලංඝණය කිරිමක් සම්බන්ධයෙන් මන්ත්‍රීවරයාට එරෙහිව චෝදනා ගොනු කර තිබේ.

2004 වසරේ අයුතු ජනරාශියක සාමාජිකත්වය දරමින් නීති විරෝධිව ගිනි අවියක් සහ ජීව පතරොම් තොගයක් සන්තකයේ තබා ගැනීමේ සිද්ධියක් සම්බන්ධයෙන් චෝදනා නගමින් මන්ත්‍රිවරයා ඇතුළු පුද්ගලයන් තුන් දෙනෙකුට එරෙහිව නඩුවක් හලාවත මහාධිකරණය හමුවෙහි පවරා තිබිණි.

පසුව 2011 වසරේ මාර්තු මස 21 වන දින සැකකරුවන් හලාවත මහාධිකරණය මගින් ඇප මත මුදා හැර තිබිණි. එම ඇප කොන්දේසි මත සැකකරුවන් සෑම ඉරුදිනකම පෙරවරු කාලයේ දි හලාවත පොලිසිය හමුවෙහි වාර්තා කළ යුතුව නියම තිබු අතර පසුව එම කොන්දේසිය ලිහිල් කරමින් සෑම මසකම අවසන් ඉරුදින හලාවත පොලිසියට වාර්තා කිරිමට නියම කර තිබිණි.

මෙම නඩුව යළි පසුගිය 10 දා  හලාවත  මහාධිකරණය හමුවෙහි විභාගයට ගත් අවස්ථාවේ දි සැකකාර පාර්ලිමේන්තු මන්ත්‍රිවරයා අවස්ථා හතරක දි මහාධිකරණය විසින් නියම කරණ ලද පොලිසියෙහි පෙනි සිටිය යුතුය යන කොන්දේසිය අවස්ථා හතරක දි කඩ කර ඇති බව හලාවත පොලිසිය අධිකරණය වෙත වාර්තා කර තිබු බැවින් ඔහු මේ මස 17 වන දින දක්වා රිමාන්ඩ් බන්ධනාගාර ගත කිරිමට නියම කළාය .

රජයේ අධිනිතිඥ අසංග රෙමන්ඩිස් මහතා පැමිණිල්ල ඉදිරිපත් කර තිබු අතර නිතිඥ නිහාල් සුමනධිර නිතිඥ අනුර මැද්දේගොඩ නිතිඥ නුවන් ජයවීර නිතිඥ නිශාදි කන්නන්ගර යන මහත්ම මහත්මීන් සැකකාර මන්ත්‍රීවරයා වෙනුවෙන් පෙනී සිටියහ.