(බිඟුන් මේනක ගමගේ)
 
කොළඹ ප්‍රසිද්ධ පෞද්ගලික පාසලක විවිධ නොසලකාහැරීම්වලට ලක් වූ බව කියන දැරියකට සුදුසු වෙනත් පාසලක් ලබාදීමට මැදිහත්වන්නැයි ජාතික ළමා ආරක්ෂක අධිකාරිය බස්නාහිර පළාත් අධ්‍යාපන අධ්‍යක්ෂවරයාගෙන් ඉල්ලා ඇත. 
 
මෙසේ නොසලකාහැරීමට ලක්වීමට හේතුව ලෙස එහි දක්වා ඇත්තේ එම පාසලේම උගැන් වූ දැරියගේ මව පිළිකා රෝගය වැළඳීම හේතුවෙන් එම පාසලෙන් ඉවත්කිරීමෙන් උද්ගත වූ තත්ත්වයක් යැයි ද මෙම ඉල්ලීම කරමින් ජාතික ළමා ආරක්ෂක අධිකාරියේ අධ්‍යක්ෂ ජනරාල් අනෝමා සිරිවර්ධන මහත්මිය විසින් පළාත් අධ්‍යාපන අධ්‍යක්ෂවරයාට යොමු කරන ලද ලිපියක දැක්වේ.
 
ජාතික ළමා ආරක්ෂක අධිකාරිය මෙම ඉල්ලීම කර ඇත්තේ සිදුවීම සම්බන්ධයෙන් කළ මූලික විමර්ශනයකින් අනතුරුවය.
 
මෙම සිද්ධිය සම්බන්ධයෙන් විමර්ශනය කළ ශ්‍රී ලංකා මානව හිමිකම් කොමිෂන් සභාව ද එම දැරිවියට අධ්‍යාපනයට සුදුසු වෙනත් පාසලක් ලබාදීමට කටයුතු කරන්නැයි අධ්‍යාපන අමාත්‍යංශට පසුගිය දා නිර්දේශ කළේය.
 
දැරිය පසුවන තත්ත්වය සලකා ඇයට සුදුසු පාසලක් ලබාදීමට මැදිහත්වන්නැයි ද අදාළ බාලිකා විදුහලේ පරිපාලනයට සිදුවීම ගැන වාර්තාවක් ලබන 12 වැනිදා වන විට මානව හිමිකම් කොමිසමට ලබාදෙන්නැයි මින් පෙර කළ නියෝගය නැවත සිහිකැඳවන්නැයිද මානව හිමිකම් කොමිසම අධ්‍යාපන අමාත්‍යංශයට එහිදී වැඩිදුරටත් දන්වා තිබිණි. 
 
අදාළ දැරිය තවමත් පාසල් නොයන බව ඇයගේ මව පැවසුවාය.