(දසුන් රාජපක්ෂ)

හිටපු අමාත්‍ය පාඨලී චම්පික මහතා රාජගිරියේදී මුහුණ දුන් බව කියන රිය අනතුර සම්බන්ධයෙන් රිමාන්ඩ් භාරයේ සිටින පොලිස්පති පූජිත් ජයසුන්දර මහතාගෙන් කොළඹ අපරාධ කොට්ඨාසයට ප්‍රකාශයක් ලබාගැනීමට අවස්ථාව සළසා දෙන ලෙස කොළඹ අතිරේක මහෙස්ත්‍රාත් ලෝචනී අබේවික්‍රම මහත්මිය බන්ධනාර අධිකාරීවරයාට අද (23) නියෝග කළාය.

මහෙස්ත්‍රාත්වරිය මෙම නියෝගය කර සිටියේ අද මෙම සිද්ධිය සම්බන්ධයෙන් මෝසමක් මගින්  කරුණු දක්වමින් කොළඹ අපරාධ කොට්ඨාසය කළ ඉල්ලීමක් කෙරෙහි අවධානය යොමු කරමිණි.

මෝසම මගින් වැඩිදුරටත් කරුණු දැක්වූ කොළඹ අපරාධ කොට්ඨාසයේ ස්ථානාධිපති ප්‍රධාන පොලිස් පරීක්ෂක නෙවිල්  ද සිල්වා මහතා අදාළ රිය අනතුර වූ අවස්ථාවේ සැකකරු පුද්ගලයන් කිහිප දෙනෙකු සමඟ දුරකතනයෙන් කතා කර ඇති බව පැවසීය. 

එසේ සැකකරු දුරකතන ඇමතුම් 20ක් එම අවස්ථාවේ ලබාගෙන ඇති නිසා ඒවාට අයත් දුරකතන වාර්තා ලබා ගැනීමට නියමිත බවත් එම අනතුර සිදු වූ අවස්ථාවේ හිටපු පොලිස්පති පූජිත් ජයසුන්දර මහතා සහ සැකකරු අතර දීර්ඝ දුරකතන සංවාදයක් සිදු වී ඇති බවත් නෙවිල් ද සිල්වා මහතා දැනුම් දුන්නේය.

පූජිත් ජයසුන්දර මහතා සමඟ ඇති වූ එම දුරකතන සංවාදය ගැන විශ්ලේෂණ වාර්තාක් කැඳවීමට අවශ්‍ය නිසා ලබන 26 ත් 30 ත් අතර දිනයක බන්ධනාගාරයට ගොස් එම ප්‍රකාශය ලබාගැනීමට පහසුකම් සළසා දෙන ලෙස බන්ධනාගාර අධිකාරීවරයාට නියෝග කරන ලෙස ද නෙවිල් ද සිල්වා මහතා ඉල්ලා සිටියේය.

අනතුර සිදුවන අවස්ථාවේ සැකකරු පැදවූ වාහනය රජයට අයත් වාහනයක් වන අතර ඔහූ එයට අළාබ කොට පොදු දේපළ පනත උල්ලංඝනය කර ඇති බව මීට ඉහතදී ගොනු කළ බී වාර්තා තුනේ සඳහන් කර තිබෙන බවද  ඔහු කියා සිටියේය.

ඒ අනුව ඉදිරිපත් වූ කරුණු සළකා බැලූ මහේස්ත්‍රාත්වරිය අදළා නියෝගයන් කර හෙට (24) මෙම පැමිණිල්ල යළි කැඳවීමට නියෝග කළාය.