(මනෝප‍්‍රිය ගුණසේකර)
 
පාස්කු ඉරිදා බෝම්බ ප‍්‍රහාරය එල්ල කිරීමට කුමන්ත‍්‍රණය කිරීම සහ මිනීමැරීම සම්බන්ධයෙන් ප‍්‍රහාරය එල්ල කිරීමේ සිද්ධියට අදාළව අත්අඩංගුවට ගෙන අධිකරණයට ඉදිරිපත් කළ හිටපු ආරක්‍ෂක ලේකම් හේමසිරි ප‍්‍රනාන්දු සහ අනිවාර්ය නිවාඩු ගන්වා සිටින පොලිස්පති පූජිත් ජයසුන්දර යන මහත්වරුන්ට ඇප නියම කරමින් ප‍්‍රධාන මහෙස්ත‍්‍රාත්වරිය දුන් නීතීවිරෝධී, අයුක්ති සහගත නියෝගය ප‍්‍රතිශෝධනය කරවා සැකකරුවන් යළි රක්ෂිත බන්ධනාගාරගත කරන්නැයි නීතීපතිවරයා වෙනුවෙන් පෙනී සිටි නියෝජ්‍ය සොලිසිටර් ජනරාල් දිලීප පිරීස් මහතා කොළඹ ප‍්‍රධාන මහාධිකරණ විනිසුරු විකුම් කළුආරච්චි මහතා හමුවේ පිළිතුරු දේශන ඉදිරිපත් කරමින් පැවසීය.

මහෙස්ත‍්‍රාත්වරයකුට නොමැති බලයක් ආරෝපනය කර ගනිමින් ඇප ලබාදීමට මහෙස්ත‍්‍රාත්වරයකුට බලයක් නොමැති චෝදනාවකට ලක්ව සිටි මෙම සැකකරුවන්ට ඇප ප‍්‍රදානය කර ඇතැයි ද පෙන්වා දුන් දිලීප පිරීස් මහතා මහෙස්ත‍්‍රාත්වරිය නීතීය අවභාවිතා කර ඇතැයිද පැවසීය.

පාස්කු ඉරිදා බෝම්බ ප‍්‍රහාරය වළක්වා ගැනීමට හෝ එම ප‍්‍රහාරයේ බලපෑම අඩුකර ගැනීමට ක‍්‍රියා නොකිරීම සම්බන්ධයෙන් සැකපිට අත්අඩංගුවට ගෙන රක්ෂිත බන්ධනාගාරගත කරනු ලැබ සිටි හිටපු ආරක්‍ෂක ලේකම් හේමසිරි ප‍්‍රනාන්දු සහ අනිවාර්ය නිවාඩු ගන්වා සිටින පොලිස්පති පුජිත් ජයසුන්දර යන මහත්වරුන්ට ඇප නියම කරමින් කොළඹ ප‍්‍රධාන මහෙස්ත‍්‍රාත් ලංකා ජයරත්න මෙනවිය ලබාදුන් නියෝගයට එරෙහිව නීතීපතිවරයා ඉදිරිපත් කර ඇති ප‍්‍රතිශෝධන ඇයැදුම්පත කැඳවනු ලැබු අවස්ථාවේදී විත්තිකරුවන් වෙනුවෙන් ඉදිරිපත් කළ කරුණු වලට පිළිතුරු දෙමින් සිය දේශණය ඉදිරිපත් කරමින් එසේ පැවසීය.

ඒ අනුව මෙම ප‍්‍රතිශෝධන ඇයැදුම් පත සම්බන්ධයෙන් කැඳවනු ලැබු අවස්ථාවේදී මෙහි සැකකාර වගඋත්තරකරුවන් වශයෙන් නම් කර ඇති හේමසිරි ප‍්‍රනාන්දු සහ පූජිත් ජයසුන්දර යන මහත්වරුන් අධිකරණය හමුවේ පෙනී සිටියහ.

මෙම ප‍්‍රතිශෝධන ඇයදුම්පත සම්බන්ධයෙන් හේමසිරි ප‍්‍රනාන්දු මහතා වෙනුවෙන් පෙනී සිටි ජනාධිපති නීතීඥ අනුජ පේ‍්‍රමරත්න මහතා ද පූජිත් ජයසුන්දර මහතා වෙනුවෙන් පෙනී සිටි ජනාධිපති නීතීඥ අනුර මැද්දේගොඩ මහතා ද මීට පෙර දිනයේ දී දීර්ඝ වශයෙන් කරුණු ඉදිරිපත් කළහ.

නීතීපතිවරයා වෙනුවෙන් නියෝජ්‍ය සොලිසිටර් ජනරාල් දිලීප පිරීස් මහතා සිය දීර්ඝ පිළිතුරු දේශනය ඉදිරිපත් කරමින් මෙසේ ද පැවසීය.