(ඉන්දිකා රාමනායක)

එක්සත් අරාබි එමිර්  රාජ්‍යයේ සිට මෙරටට පැමිණි පුද්ගලයකු නැව්ත කළ භාණ්ඩ අතර සඟවා රුපියල් ලක්ෂ 25 ක කොකේන් මත්කුඩු සහ දුම්වැටි අත්අඩංගුවට ගත් බව විශේෂ කාර්ය බළකාය පවසයි.

එක්සත් අරාබි එමීර් රාජ්‍යයේ වෙසෙන මත්කුඩු ජාවාරම්කරුවන් විසින් මෙම තරුණයාගේ නැව් ගත කළ භාණ්ඩ අතර සඟවා මේවා මෙරටට එවා ඇති බව ද විශේෂ කාර්ය බළකාය පවසයි.

මෙම තරුණයා ඉකුත් ජූලි මස මෙම භාණ්ඩ මෙරටට එවා ඇති අතර, ඊයේ(26) එම භාණ්ඩ නිෂ්කාශනය කර ලොරි රථයකින් කැලණිය ඊරියවැටිය ප්‍රදේශයේ නිවසට රැගෙන යන අතරතුරේ දී විශේෂ කාර්ය බළකායේ බුද්ධි අංශ නිලධාරීන් විසින් මෙම වැටලීම සිදුකර තිබිණි .

මෙම නීති විරෝධී භාණ්ඩ මෝටර් රථ උපකරණයක් තුළ සූක්ෂම ලෙස සඟවා තිබූ බවත් කොකේන් මත්කුඩු ග්‍රෑම් 53 යි මිලිග්‍රෑම් 510 ක් සහ නීති විරෝධී දුම්වැටි 7200 ක් තිබූ බව ද විශේෂ කාර්ය බළකාය කියයි.

මෙම භාණ්ඩ මෙරටට රැගෙන ආ සැකනරු සහ එම භාණ්ඩ රැගෙන ඒමට ලොරි රථයකින් ගමන්ගත් පුද්ගලයා ද අත්අඩංගුවට ගෙන ඇත.