(ඩයනා උදයංගනී)

ඉතාලියේ, මිලානෝ නුවර ශ්‍රී ලංකා කොන්සල් ජනරාල්වරිය ලෙස සේවය කරමින් සිටියදී අභාවප්‍රාප්ත වූ ප්‍රවීණ ගායිකා විශාරද නීලා වික්‍රමසිංහ මහත්මියගේ දේහය ලබන බදාදා (26) අළුයම මෙරටට රැගෙනඒමට නියමිතය.

හදිසියේ ඇතිවූ හෘදයාබාධයක් හේතුවෙන් මිලානෝහි සැන් රෆායල් රෝහලට ඇතුළත් කෙරුණු ඇය ඉකුත් 17 වැනිදා උදෑසන අභාවප්‍රාප්ත වූවාය.

දේහය මෙරටට ගෙන්වීමට අදාළ සියලු විදේශ කටයුතු අමාත්‍යාංශය මගින් සිදුකෙරෙන බවත්, ඇගේ අවසන් කටයුතු සිදුකෙරෙන ආකාරය ‍හෙට (24) දිනයේදී තීරණය කිරීමට නියමිත බව සඳහන් වේ

නීලා වික්‍රමසිංහ මහත්මියගේ දේහය ශ්‍රී ලංකාවට ගෙනඒමට පෙර එරට පදිංචි ශ්‍රී ලාංකිකයන්ට අවසන් ගෞරව දැක්වීම සඳහා ඊයේ (22) පස්වරුවේ මිලානෝ හි පිහිටි පෞද්ගලික මල් ශාලාවක තැන්පත් කර තිබිණි.

ඇයගේ අවසන් ඉල්ලීමක් අනුව දේහය විවෘත නොකර වසා තබා තිබිණි.

මෙහිදී භික්ෂූන් වහන්සේලා සහ කතෝලික පියතුමන්ලා විසින් අවසන් ආගමික වතාවත් ද සිදුකළ අතර නීලා වික්‍රමසිංහ මහත්මියගේ සැමියා වන කපිල හේරත් මහතා ඇතුළු පිරිස විසින් මෙහිදී මතකවස්ත්‍ර පූජාව ද සිදුකරනු ලැබිණි.