(ඩයනා උදයංගනී)

මෙම මස අගදී සක‍්‍රීයවීමට නියමිත නිරිත දිග මෝසම සමග ආපදා තත්ත්වයක් ඇතිවුවහොත් කොරෝනා වසංගත තත්ත්වයත් සමඟ එයට මුහුණ දිය යුතු ආකාරය සම්බන්ධයෙන් සැලැස්මක් සකස් කර ඇතැයි ආපදා කළමනාකරණ මධ්‍යස්ථානය පවසයි.
 
සෞඛ්‍ය අංශ සමග ද සාකච්ඡා කර ඔවුන්ගේ උපදෙස් පරිදි මෙම සැලැස්ම සකස් කළ බව එම මධ්‍යස්ථානයේ සහකාර අධ්‍යක්‍ෂ (මාධ්‍ය) ප‍්‍රදීප් කොඩිප්පිලි මහතා පැවසීය.
 
නිරිත දිග මෝසම මෙම මස අගදී සක‍්‍රීය වනු ඇතැයි කාලගුණ විද්‍යා දෙපාර්තමේන්තුව අනාවැකි පළ කර ඇති බවත්, සාමාන්‍යයෙන් නිරිත දිග මෝසම් සමයේදී ගං වතුර, තද සුළං හා නායයෑම් වැනි ආපදා ඇතිවිය හැකි නිසා මෙම සැලසුම සකස් කළ බවත් කොඩිප්පිලි මහතා සදහන්  කළේය.
 
එවැනි තත්ත්වයක් ඇතිවුවහොත් පීඩාවට පත්වන ජනතාව ආරක්‍ෂිත ස්ථානවලට යොමු කිරීම, ඒවායේදී ඔවුන්ට අවශ්‍ය සෞඛ්‍ය පහසුකම් සැලසීම ආදිය කෙරෙහි මෙහිදී වැඩි අවදානයක් යොමු කළ බව ද ඔහු කීවේය.
 
ඒ අනුව කිසියම් නායයෑම් හෝ ගංවතුර අවදානමක් පවතින්නේ නම් අනතුරුදායක තත්ත්වයක් ඇතිවන තුරු නොසිට ඊට පෙරම අවදානම් සහිත ජනතාව ඉවත් කිරීමටත්, ඔවුන් ඥාතීන්ගේ නිවෙස් වෙත හෝ ඉඩකඩ ඇති පරිදි ආරක්‍ෂිත ස්ථානවලට යොමු කිරීමටත් පියවර ගන්නා බව කොඩිප්පිලි මහතා පැවසීය.
 
විශේෂයෙන්ම ඔවුන් රදවන ස්ථානවල සෞඛ්‍යාරක්‍ෂිතව ආහාර ලබාදීම, නිදාගැනීමේදී නියමිත පරතරයක් තැබීම, අත් සෝදාගැනීමේ පහසුකම් සැලසීම, විෂබීජ නාශක ලබාදීම ආදී කටයුතු සිදුකරන බව ද ඔහු කීවේය.
 
මෙන්ම එම පහසුකම් සැලසීම ස`දහා අදාළ අංශ සූදානම් කරවීම මේ වන විටත් සිදුවන බවද හෙතෙම සඳහන් කළේය.