(ඉන්දිකා රාමනායක)

නීතිඥ  මනෝජ් ගමගේ  මහතා මාධ්‍ය හමුවක් පවත්වා  කුරුණෑගල වෛද්‍ය සාෆි සිහාබ්දීන් සම්බන්ධයෙන් සිදුකරන විමර්ශන විවේචනය කරමින්     අපරාධ පරීක්ෂණ දෙපාර්තමේන්තුවේ අධ්‍යක්ෂ ශානි අබේසේකර මහතාට තර්ජනය කිරීමේ සිද්ධිය ඉදිරියේ දී වින්දිතයන් හා සාක්කිකරුවන් ආරක්ෂා කිරීමේ අධිකාරියට, ශ්‍රේෂ්ඨාධිකරණයට හා නීතිඥ සංගමයට පැමිණිලි කරන බව පොලිස් මාධ්‍ය ප‍්‍රකාශක පොලිස් අධිකාරී රුවන් ගුණසේකර මහතා  පැවසීය.

ඕනෑම  විමර්ශනයක්  විවේචනය කිරීමට , සාධනීය විවේචන ඉදිරිපත් කිරීමට  ඕනෑම  පුද්ගලයකුට  හැකියාවක් ඇති බවත්   විමර්ශන සිදුකරන නිලධාරීන්ට තර්ජනය  කිරීමට කිසිවකුට නොහැකි බවද රුවන් ගුණසේකර මහතා කියා සිටියේය.

මෙම මාධ්‍ය හමුවේ දී අපරාධ පරීක්ෂණ දෙපාර්තමේන්තුවේ අධ්‍යක්ෂවරයාට  ජම්පරයක් අන්දවන බවට නීතිඥ මහතා  ප‍්‍රකාශ කර ඇති බවත් පුද්ගලයකුට ජම්පර් අන්දන බවට  නීතිවරයකුට ප‍්‍රකාශ කිරීමට හැකියාවක් නොමැකි බවත් එය තීරණය කරන්නේ  අධිකරණය  විසින්   බවද රුවන් ගුණසේකර මහතා කියා සිටියේය.

වෛද්‍ය සාෆි මහතා සම්බන්ධයෙන් සිදුකරන විමර්ශනයේ ප‍්‍රධාන විමර්ශන නිලධාරියා වන ජ්‍යෙෂ්ඨ පොලිස් අධිකාරි  ශානි අබේසේකර මහතාට කර ඇති මෙම තර්ජනය පොලිස් දෙපාර්තමේතුව වශයෙන් තරයේ හෙළා දකින බවද   රුවන් ගුණසේකර  මහතා වැඩිදුරටක් කීය.

මෙම තර්ජනය සම්බන්ධයෙන් ශානි අබේසේකර මහතා කොටුව පොලිසියට පැමිණිල්ලක් ඉදිරිපත් කර ඇත.