(ඩයනා උදයංගනී)

අධික සුළං සහිත කාලගුණය මත නිව් ඩයමන්ඩ් බොරතෙල් ප්‍රවාහන නෞකාවේ  නැවතත් වර්ධනය වූ  ගින්න මේ වන විට යම් තරමකට පාලනය කර ඇතැයි නාවික හමුදාව පවසයි.

ශ්‍රී ලංකා නාවික හමුදාව, ශ්‍රී ලංකා ගුවන් හමුදාව, ඉන්දීය නාවික හමුදාව, ඉන්දීය වෙරළ ආරක්‍ෂක දෙපාර්තමේන්තුව ඇතුළු අනෙකුත් පාර්ශවකරුවන්ට අයත් නෞකා, ගුවන් යානා සහ ටග් යාත්‍රා තවදුරටත් මෙම මෙහෙයුමේ අඛණ්ඩව නිරතව සිටින බව නාවික හමුදා මාධ්‍ය ප්‍රකාශක කපිතාන් ඉන්දික ද සිල්වා මහතා පැවසීය.

ආපදාවට පත් නෞකාවේ වාණිජ හා තාක්‍ෂණික ක්‍රියාකාරිත්වය හිමි සමාගම විසින් දිවයිනට යොමු කරන ලද මුදවා ගැනීමේ මෙහෙයුම් විශේෂඥයින් 06 දෙනෙකු සහ ආපදා කළමනාකරණ විශේෂඥයින් 11 දෙනෙකුගෙන් යුත් කණ්ඩායම ද නෞකාව ඇති මුහුදු ප්‍රදේශයට ගොස් ආපදා කළමනාකරණ මෙහෙයුම් හා එක්ව සිටින අතර, ඔවුන්ගේ ද උපදෙස් මත ශ්‍රී ලංකා නාවික හමුදාව ප්‍රමුඛ ආපදා කළමනාකරණ කණ්ඩායම් මෙම වර්ධනය වූ ගින්න නැවතත් මැඩපැවැත්වීමේ ප්‍රයත්නයේ නිරතව සිටින බව ඔහු කීවේය.