(කාංචන කුමාර ආරියදාස)

වසර කිහිපයකට පසු මෙවර දේශීය ලොකු ලූනු වගාව නැවත ආරම්භ කිරීම සඳහා ගොවීන් සූදානම් වෙද්දී ජලය ,පොහොර හා බිජ ගැටළුවක් නිසා නැවතත් ලොකු ලූණු වගාව අනතුරේ වැටීමට යන බව දඹුල්ලේ ගොවීහු පවසති.

දේශීය ලොකු ලූනු වගාව මාතලේ දිස්ත්‍රික්කයේ බහුල වශයෙන් ව්‍යාප්ත විය .

ඒ අනුව පසුගිය කාලයේ මාතලේ දිස්ත්රික්කයේ පමණක් ලොකු ළූණු හෙක්ටයාර් තුන් දහසක් පමණ වගා කෙරිණි .

පසුගිය වසරේ වගා කෙරුණේ හෙක්ටයාර් 230ක වැනි ඉතා අඩු ප්‍රමාණයකි .ක්‍රම ක්‍රමයෙන් ලොකු ලූනු වගාවෙන් ගොවීන් ඈත් වෙද්දී මෙවර ලොකු ලූනු ගොවියා දිරිමත් කිරීම සඳහා රජය දේශීය ලොකු ලූනු ගැණුම් මිල රුපියල් 90 දක්වා සම්මත මිලක් ප්‍රකාශයට පත් කෙරුණි .

ඒ අනුව දඹුල්ල ,සීගිරිය ,ගලේවෙල ,දේවහුව ,නාඋල ,පල්ලේගම ආදී ගොවිජන සේවා බල ප්‍රදේශවල ගොවීන් නැවත ලොකු ලූණු වගාව ආරම්භ කිරීම සඳහා සූදානම් වූහ.

එහෙත් ලොකු ලූනු වගා කරුවන් බිම් සකසා ගාවට අවශ්‍ය බීජ ලූනු සපයා ගැනීමේ අපහසුතාවයකට පත්ව සිටිති.

රුපියල් 7500 ක් පමණ වටිනාකමකින් යුත් විදේශීය ලොකු ලූනු බීජ කිලෝව රුපියල් 15000 දක්වා රුපියල් 10000 ක් වූ දේශීය ලොකු ලූනු බීජ කිලෝව රුපියල් විසිපන්දාහ දක්වා වැඩිවීම වගාව අඩු වීමට බරපතළ ලෙස බලපා ඇතැයි ගොවීන් කියති.

එමෙන්ම ලොකු ලූනු වගාව සඳහා ජලය සපයනු ලබන්නේ කණ්ඩලම ජලාශයෙනි .

මෙවර කණ්ඩලම ජලාශය දියවර නිකුත් කිරීම ප්‍රමාද කොට 40% ක වගාව සඳහා දින දාහතරකට වරක් ජල මුර ක්‍රමයට නිකුත් කිරීමට මහවැලි අධිකාරිය තීරණය කිරීම නිසා ගොවීන් තවදුරටත් කබලෙන් ළිපට වැටී තාවන් දැමූ සහ බිම් සැකසුම් වගාබිම් වලින් ඉවත් වීමට සිදුව ඇතැයි ගොවීන් කියති.

බීජ හිගය ජල හිගය අමතරව ලොකු ලූණු වගාව සදහා අවශ්‍ය පොහොර හිගය බරපතළ ලෙස මතුවීම හේතුවෙන් මෙවර ද ලොකු ලූනු ගොවීන් වගාවෙන් ඉවත් වීමට සූදානමක් පවතින බව දඹුල්ලේ ලොකු ලූනු ගොවීන් වැඩි දුරටත් පවසති.

මෙරටට අවශ්‍ය ලොකුලූනු මාස 06 කට සෑහීම ප්‍රමාණයක් දේශීයව වගා කිරීමට හැකියාව තිබිණි .එමෙන්ම 2015 වසර වන විට සියයට සීයක් රටට අවශ්‍ය ලූනු වගා කිරීමට පසුගිය කාලයේ දේශීය ලූනු ගොවීන් ඉදිරිපත්ව සිටියහ.