(සුජිත් හේවාජුලිගේ)

මෙරට පාසල් තුන් දහසක දරුවන් ලක්ෂ 7 කට අධික සංඛ්‍යාවකට ඔන්ලයින් පහසුකම් නොමැති බව අධ්‍යාපන අමාත්‍යාංශයේ ලේකම් මහාචාර්ය කපිල පෙරේරා මහතා පැවසීය.

ඔන්ලයින් පහසුකම් නොමැති දරුවන්ගේ අධ්‍යාපන කටයුතු ඉදිරියට පවත්වාගෙන යෑම සඳහා රජය දැනටමත් සැලසුම් සකස් කර ඇති බවත් එවැනි දුෂ්කරතා සහිත සිසුන් වෙනුවෙන් මහින්ද්‍යෝදය විද්‍යාගාර මාර්ගයෙන් අධ්‍යාපනය ලබාදීමට අපේක්ෂා කරන බවත් අධ්‍යාපන ලේකම්වරයා සඳහන් කළේය.

සංචරණ සීමා ලිහිල් කෙරුණු අවස්ථාවන්හිදී දරුවන් සෞඛ්‍යාරක්ෂිතව එම මධ්‍යස්ථානවලට කැඳවා උදේ 7.30සිට පස්වරු 3.30 දක්වා විෂයමාලා ඉගැන්වීමේ හැකියාව පවතින බව අධ්‍යාපන ලේකම්වරයා වැඩිදුරටත් පැවසුවේය.

මේ අතර පාසල් දරුවෝ දහස් සංඛ්‍යාත පිරිසක් ඔන්ලයින් පහසුකම් සඳහා ප්‍රමාණවත් සංඥා නොමැතිකම නිසාද පීඩාවට පත්ව සිටිති .මේ නිසා එම දරුවන්ට සංඥා ලබා ගැනීම සඳහා විවිධ අනතුරුදායක ස්ථාන පසු කරමින් උස් කඳු මුදුන්වලට යෑමටත් ගස්වලට නැගීමටත් අද දවසේ සිදුවී ඇත.