(ක්‍රිෂාන් ජීවක ජයරුක් )

දික්වැල්ල යෝනකපුර ප්‍රදේශයේ අද (28) දවස පුරා සිදු කළ විශේෂ සෝදිසි මෙහෙයුමකදී කඩු හතරක් හා පුහුණු පතොරම් 107 ක් ඇතුළු සැකකටයුතු උපකරණ ළඟ තබාගෙන සිටි මුස්ලිම් ජාතික පුද්ගලයින් 10 දෙනෙකු සැකපිට ප්‍රශ්න කිරීම සඳහා අත්අඩංගුවට ගත් බව දික්වැල්ල පොලීසිය පවසයි.

යුද හමුදාව හා පොලීසිය ඒකාබද්ධව එම ගම්මානය වට කර මෙම සෝදිසි මෙහෙයුම ක්‍රියාත්මක කර තිබේ.

එහිදී ඉස්ලාමීය ආගමික පොත් ගිනි තබා පුළුස්සමින් සිටි 23 හැවිරිදි තරුණයකු ද පොලිස් අත්අඩංගුවට පත්ව ඇත.

ඊට අමතරව සැකකරුවන් සිව් දෙනෙකු සන්තකයේ තිබු කඩු වලින් කඩු දෙකක් මීට පෙර කොළඹ මුස්ලිම් පල්ලියක තිබී සොයා ගත් කඩු වලට සමාන ඒවා බව පොලීසිය සඳහන් කරයි.

පතරොම් තොගය සමඟ අත්අඩංගුවට ගත් සැකකරුගේ නිවස තුළ තිබී විදේශීය රටක ආරක්ෂක හමුදාවක් භාවිත කරන හමුදා නිල ඇඳුම් කට්ටලයක්, දුරදක්නයක් හා පතොරම් බහාලුමක් පොලීසිය සොයා ගෙන ඇත.

ඊට අමතරව අරාබි ජාතිකයකුගේ හැඳුනුම්පතක් ද සොයා ගෙන තිබේ.

මෙම සෝදිසි මෙහෙයුමේ දී එම ප්‍රදේශයේ නිවාස 850ක් පරික්ෂාවට ලක් කළ බව පොලීසිය කියයි.

එහිදී අත්අඩංගුවට ගත් සැකකරුවන් පිරිස අද (29) මාතර මහේස්ත්‍රාත් අධිකරණයට ඉදිරිපත් කිරීමට නියමිතය.