(නිමන්ති රණසිංහ)
 
ලංකා ඛණිජ තෙල් නිතිගත සංස්ථා පරිශ‍්‍රය තුළට අයුතු ඇතුළුව පුද්ගලයකුට පහරදී තුවාල සිදුකළැයි කියන සිද්ධියට අදාළව අමාත්‍ය අර්ජුන රණතුංග මහතා සම්බන්ධයෙන් ගන්නා ඉදිරි පියවර පිළිබඳව නිතිපතිවරයාගෙන් උපදෙස් ලබාගෙන අධිකරණයට වාර්තාවක් ඉදිරිපත් කරන ලෙස කොළඹ ප‍්‍රධාන මහේස්ත‍්‍රාත් ලංකා ජයරත්න මෙනෙවිය අද (01) කොළඹ අපරාධ කොට්ඨාසයට නියෝග කළාය.
 
සිද්ධියට සම්බන්ධයෙන් පැමිණීලිකරු වෙත කිසිවකුට හෝ පහරදීමකට අදාළ කිසිවක් සී සී ටී වී දර්ශනවල සටහන් නොවන බවත් බහින් බස් වීමක් පමණක් දර්ශනය වන බවත් කොළඹ අපරාධ කොට්ඨාසය අධිකරණය වෙත කළ දැනුම් දිම මත සැකකාර අමාත්‍යවරයා සම්බන්ධයෙන් ඉදිරි පියවර ගැන එලෙස කරුණු වාර්තා කරන ලෙසට අධිකරණය කොළඹ අපරාධ කොට්ඨාසයට නියෝග කළේය.
 
මෙම සිද්ධියට අදාළ මහේස්ත‍්‍රාත් පරීක්ෂණය අද (1) අධිකරණය හමුවේ යළි කැඳවූ අවස්ථාවේදී වැඩිදුර වාර්තාවක් අධිකරණය වෙත ඉදිරිපත් කරමින් කොළඹ අපරාධ කොට්ඨාසය එලෙස සඳහන් කළ අතර, ඇප මත සිටිමින් අමාත්‍ය අර්ජුන රණතුංග මහතා අධිකරණය හමුවේ පෙනී සිටියේය.
 
කොළඹ නාගරික මන්ත්‍රී කුලතිස්ස ගීකියනගේ මහතාගේ පැමිණිල්ලකට අනුව කොළඹ අපරාධ කොට්ඨාසය අත්අඩංගුවට ගත් හිටපු ඛණිජ තෙල් අමාත්‍ය අර්ජුන රණතුංග මහතා රුපියල් ලක්ෂ පහක ශරීර ඇපයක් මත මුදා හැරීමට අධිකරණය නියෝග කර තිබුණේ ඉකුත් නොවැම්බර් 29 වැනිදාය.