(ඉන්දිකා රාමනායක)

ලංකා ඛනිජ තෙල් නීතිගත සංස්ථා පරිශ්‍රයට ඇතුළු වී නීති විරෝධී රැස්වීමක සාමාජිකයින් වෙමින් ගිනි අවියකින් වෙඩි තබා මනුෂ්‍ය ඝාතනයක් සිදුකිරීම සහ තවත්  දෙදෙනකුට තුවාල සිදුකර මනුෂ්‍ය ඝාතනයකට තැත් කළැයි කියන සිද්ධියට අදාළව හඳුනා ගැනීමේ පෙරට්ටුවක්  සඳහා රිමාන්ඞ් බාරයට පත්කර සිටි   ඇමැති අරක්ෂක අංශයේ පොලිස් සැරයන්වරයා ලබන මස  15 වැනි දින දක්වා රිමාන්ඞ් බාරයට පත්කරන ලෙසට කොළඹ ප්‍රධාන මහේස්ත්‍රාත් ලංකා ජයරත්න මෙනවිය අද (12)  නියෝග කළාය.

මෙලෙස රිමාන්ඞ් බාරයට නියම වුයේ ඇමැති ආරක්ෂඅක අංශයේ සේවය කරමින් සිටි කඩුපිටියගේ අරුණ  ශ්‍රිනන්ද  සිල්වා නැමැත්තාය.

කොළඹ අපරාධ කොට්ඨාසය  විසින් අත්අඩංගුවට ගත්  සැකකාර සැරයන් ඉකුත්  29 දින හඳුනා ගැනීමේ  පෙරට්ටුවක්  සඳහා  අධිකරණයට  ඉදිරිපත් කිරීමෙන් පසු  අද දක්වා රිමාන්ඞ් බාරයට පත්කර තිබුණි.

මෙම හඳුනා ගැනීමේ පෙරට්ටුව අද කැඳවූ අවස්ථාවේ කොළඹ අපරාධ කොට්ඨාසය සාක්කිකරුවන් තිදෙනකු අධිකරණයට ඉදිරිපත් කර තිබූ අතර  එම සාක්කිකරුවන් තිදෙනා අතරින් දෙදෙනකු  සැකකාර සැරයන්වරයා පෙරට්ටුවේ දී හඳුනාගත්හ.

කොළඹ අපරාධ කොට්ඨාසයේ  හඳුනාගැනීමේ පෙරට්ටුව සඳහා සාක්කිකරුවන් සිව් දෙනකු නම්කර තිබුණද සිද්ධියේ වෙඩි වැදී තුවාල ලැබූ  එක් සාක්කිකරුවකු අද අධිකරණය හමුවේ  පෙනී නොසිටියේය.

සිද්ධියේ කැඳවීම මෙම මස 15 වැනි දිනට නියමවූ අතර එදිනට  මියගිය අයගේ  මහේස්ත්‍රාත් මරණ පරීක්ෂණය පැවැත්වීමටද  නියම කෙරිණි.