( උපාලි ආනන්ද)

ඉස්ලාම් භක්තිකයන්ගේ මල සිරුරු භූමදානයට නිත්‍යානුකූලව වෙන් කර ඇති පොදු සුසාන භූමියක රථ ගාලක් ඉදිකිරීමට තලාව ප්‍රාදේශීය සභාව ගෙන ඇති තීරණය බල රහිත කරන ලෙස ඉල්ලා මහාධිකරණයට ඉදිරිපත් කළ පෙත්සමක් සලකා බැලූ උතුරු මැද පළාත් බද මහාධිකරණ විනිසුරු මනෝජ් තල්ගොඩපිටිය මහතා පෙත්සම විභාගය අවසන් කර තීන්දුවක් ලබා දෙන තුරු ප්‍රශ්න ගත සුසාන භූමියෙහි කිසිදු ඉදිකිරීමක් සිදු නොකරන ලෙසට නියෝග කළේය.  

එමෙන්ම මෙම සුසාන භූමිය ඉස්ලාම් භක්තිකයන්ගේ මල සිරුරු භූමදානය කිරීමට හැර වෙනත් කිසිදු කටයුත්තකට යොදා නොගන්නා ලෙසටද වගඋත්තරකාර ප්‍රාදේශීය සභා සභාපතිවරයාට තවදුරටත් නියෝග කළ මහාධිකරණ විනිසුරුවරයා අදාල සුසාන භූමිය තුළ මල සිරුරු භූමදානය කිරීමට බාධා නොකරන ලෙසටද නියෝග කළේය.

මෙම අධිකරණ නියෝග කඩ කළ හොත් අධිකරණයට අපහාස කළා සේ සලකා නීතිමය පියවර ගන්නා බවටද මහාධිකරණ විනිසුරුවරයා වගඋත්තරකාර ප්‍රාදේශීය සභා සභාපතිවරයාට තවදුරටත් දැන්වීය

එප්පාවල තලාව පාර පොලිසිය හංදිය පදිංචි ජෙයිනූල් ආබ්දීන් එප්පාවල 16 කනුව පදිංචි මොහොමඩ් හෆීල් එප්පාවල ඇඳගල පදිංචිකරුවන් වන මොහොමඩ් කන්නු ෆාරුක් සහ මොහොමඩ් සතාර් සහ මහඉලුප්පල්ලම ගල්මඩුව පදිංචිකරුවන් වන මුම්මු ජසිතා සහ සින්නි ෆාරීදා යන මහත්ම මහත්මීන් නීතිඥ බුද්ධික ලෙව්කෝ බංඩාර මහතා මගින් අනුරාධපුර මහාධිකරණයට ඉදිරිපත් කල පෙත්සමක් සලකා බැලීමෙන් අනතුරුව මෙම නියෝග කළේය.