(රංජිත් රාජපක්ෂ) 

තලවකැලේ ලිදුල නගර සභාවේ වත්මන් සභාපති අසෝක සේපාල මහතාගේ ධුරය මධ්‍යම පළාත් ආණ්ඩුකාර ලලිත් යු ගමගේ මහතා විසින් වහාම ක්‍රියාත්මක වන පරිදි අද (28) දින සිට තාවකාලිකව අත්හිටුවා තිබේ.
 
සභාපතිවරයා සිදු කළේ යැයි කියන දුෂණ වංචා 8 ක් සම්බන්ධයෙන් පරික්ෂණයක් පැවැත්විම සදහා විශේෂ කොමිසමක් පත්කර ඇති අතර එම පරීක්ෂණය අවසන් වන තෙක් සභාපතිවරයාගේ ධුරය තාවකාලිකව අත්හිටවා ඇත.
 
මේ සම්බන්ධයෙන් තලවකැලේ ලිදුල නගර සභාවේ සභාපති අසෝක සේපාල මහතා කියා සිටියේ තම නගර සභාවේ නාගරික මන්ත්‍රිවරයෙකු විසින් 2019 වසරේ මැයි මාසයේ චෝදනා 8 ක් සම්බන්ධයෙන් මධ්‍යම පළාත් ආණ්ඩුකාරවරයාට සහ පළාත් පාලන ආයතන කොමසාරිස්වරයාට පැමිණිල්ලක් ඉදිරිපත් කර තිබු බවයි. එම පැමිණිල්ලට පරීක්ෂණයක් පැවැත්වු බවත් , එම පරීක්ෂණ වාර්තාව ඉදිරිපත් නොකර එම චෝදනාවලටම  යලිත් පරීක්ෂණයක් පැවැත්වීම සදහා කොමිසමක් පත් කර තමන්ගෙන් ධුරය තාවකාලිකව අත්හිටවා ඇති බවත්ය.
 
තම ධුරය අත්හිටුවීම හුදෙක් දේශපාලන පළිගැනීමක් බවත්, තමන් ඕනැම පරීක්ෂණයකට මුහුණ දිමට ඉදිරිපත් වන බවත් අශෝක සේපාල මහතා කියා සිටියේය.
 
නීති විරෝධී ලෙස සේවකයින් සේවයට බදවා ගැනීම, විධිමත් ටෙන්ඩර් පටිපාටියක් ක්‍රියාත්මක නොකර නගර සභාව සතු ඉඩම් සහ ගොඩනැගිලි තාවකාලිකව බදු දීම, නිවැරදි පටිපාටියකින් තොරව ටෙන්ඩර් කැදවීම, නගර සභා සිමාව තුල ඉදි කර ඇති අනවසර ඉදි කිරීම් නතර කිරීමට පියවර නොගැනීම, නීති විරෝධී ලෙස නගර සභාවට ලේකම්වරයෙකු පත් කර ගැනීම යන චෝදනා ඇතුළු කරුණු 8 ක් සහිත චෝදනා පත්‍රයක් තමන් වෙත ඉදිරිපත් කර ඇති බව අසෝක සේපාල මහතා කියා සිටියේය.
 
එක්සත් ජනතා නිදහස් සංගමයේ මහ ලේකම්වරයා වශයෙන් කටයුතු කරනු ලබන්නේද අසෝක සේපාල මහතා වන අතර ඒ මහතා 2011 වසරේ සිට තලවකැලේ ලිදුල නගර සභාවේ සභාපතිවරයා ලෙස කටයුතු කරනු ලබයි.