(සුජිත් හේවාජුලිගේ)

ත්‍රස්තවාදී ක්‍රියා සම්බන්ධයෙන් සිර දඬුවම් විඳින සහ රැඳවුම් නියෝග මත අත්අඩංගුවේ පසුවන පුද්ගලයන් සම්බන්ධයෙන් සොයා බැලීම, නිදහස් කිරීම සහ ඇප ලබාදීම ඇතුළු තීරණ සම්බන්ධයෙන් තමාට නිර්දේශ සහ උපදෙස් ලබා දීම සඳහා උපදේශක මණ්ඩලයක් ජනාධිපති ගෝඨාභය රාජපක්ෂ මහතා විසින් පත් කරනු ලැබ සිටී.

හිටපු අගවිනිසුරු අශෝක ද සිල්වා මහතාගේ සභාපතිත්වයෙන් යුතු මෙම උපදේශක මණ්ඩලයේ සෙසු සාමාජිකයන් ලෙස විශ්‍රාමලත් මහාධිකරණ විනිසුරු ඒ ඒ ආර් හෙයියන්තුඩුව සහ විශ්‍රාමලත් සොලිසිටර් ජනරාල් සුහද ගම්ලත් යන මහත්වරු පත් කරනු ලැබ සිටිති.

ජනාධිපතිවරයා මෙම උපදේශක මණ්ඩලය පත් කරනු ලැබ ඇත්තේ 1979 අංක 48දරන ත්‍රස්තවාදය වැළැක්වීමේ පනතේ 13 වැනි වගන්තිය අනුවය.

ත්‍රස්තවාදී ක්‍රියා සම්බන්ධයෙන් සිරගතව සිටින පිරිස් වලට මෙවැනි උපදේශක මණ්ඩලයක් කාලයක් තිස්සේ පත්කරනු ලැබ නොතිබීම නිසා තමන්ගේ අයිතිවාසිකම් සම්බන්ධයෙන් කරුණු ඉදිරිපත් කිරීමට අවස්ථාවක් නොලැබුණු බව ජනාධිපති නීතිඥ අධ්‍යක්ෂ ජනරාල් නීතිඥ හරිගුප්ත රෝහණදීර මහතා පැවසීය.

මෙම උපදේශක මණ්ඩලය පත් කිරීමත් සමඟ එම සිරකරුවන්ට ඔවුන්ගේ ගැටලු ඉදිරිපත් කිරීමට අවස්ථාව හිමිවී ඇතැයි ද හෙතෙම සඳහන් කළේය.