(නිමල කොඩිතුවක්කු)

 

හතරවන කාර්මික  විප්ලවයෙන්  ලෝකයේ සෞඛ්‍ය පහසුකම් දියුණුවට පත් වන බැවින් ඒ සම්බන්ධයෙන් අවධානය යොමුකර රටේ ආර්ථික , සමාජීය සැලසුම් සකස් කළ යුතුව ඇතැයි අග‍්‍රාමාත්‍ය රනිල් වික‍්‍රමසිංහ මහතා කොළඹ දී අද (24)  පැවැසීය.

තාක්ෂණයත් සමඟ දියුණුවන ලෝකය ජය ගැනීම සඳහා සෑම ක්ෂේත‍්‍රයක්ම එකසේ ඉදිරියට යා යුතු බවද අග‍්‍රාමාත්‍ය රනිල් වික‍්‍රමසිංහ මහතා සඳහන් කළේය.

අග‍්‍රාමාත්‍ය රනිල් වික‍්‍රමසිංහ මහතා මේ බව පැවසුවේ කොළඹ කිංස්බෙරි හෝටලයේ පැවැති හතරවන කාර්මික  විප්ලවය සහ සෞඛ්‍ය ආරක්ෂණය පිළිබඳ සම්මන්ත‍්‍රණයේ ප‍්‍රධාන ආරාධිතයා ලෙස එක්වෙමිණි.

එහිදී අදහස් දැක්වූ අග‍්‍රාමාත්‍ය රනිල් වික‍්‍රමසිංහ මහතා,

      ‘‘හතරවන කාර්මික  විප්ලවය පිලිබඳ සෞඛ්‍ය ක්ෂේත‍්‍රයට සම්බන්ධ පිරිස් කතා කිරීම ඉතා විරල තත්ත්වයක් වනවා. එහෙම තිබියදී මෙවැනි මාතෘකාවක් තෝරාගැනීම කාලෝචිතයි.

ලංකාවේ සෞඛ්‍ය ක්ෂේත‍්‍රය පිළිබඳ කතා කිරීමේදී අපේ සෞඛ්‍ය ක්ෂේත‍්‍රය ඉතා සීඝ‍්‍රයෙන් දියුණු වෙමින් පවතිනවා. ලංකාවේ සෞඛ්‍ය ක්ෂේත‍්‍රයේ දියුණුව සඳහා වත්මන් රජය ගෙන ඇති පියවර කාටවත් සම කරන්න බැහැ.

සෞඛ්‍ය ක්ෂේත‍්‍රය තව දියුණු කිරීම සඳහා නවීන තාක්ෂණික උපක‍්‍රම යොදාගත යුතුයි. ඒ සඳහා යන වියදම  සම්බන්ධයෙන් සෞඛ්‍ය අමාත්‍යවරයාගෙන් විමසීමක් කළා. මුලින් එම වියදම අධිකව පැවතුනත් පසුව එම මිල අඩුවිය හැකි බව සෞඛ්‍ය අමාත්‍යවරයා සඳහන් කළා.

හතරවන කාර්මික  විප්ලවයත් සමඟ පවතින තත්ත්වයන් වෙනස් විය හැකියි. තුන්වන කාර්මික විප්ලවයේදී එය සෞඛ්‍ය ක්ෂේත‍්‍රයට බලපාන අන්දම සම්බන්ධයෙන් සාකච්ඡාවට බදුන් වුණා.

ආසියානු කලාපයේ රටවල් හතරවන කාර්මික  විප්ලවයට මුහුණ දෙන්න  සූදානමින් සිටිනවා. එහි සම්පූර්ණ ප‍්‍රයෝජන ලබා ගැනීමට එම රටවල් අපේක්ෂාවෙන් පසුවනවා.

අද රෝහලකට ගිහින් නේවාසික ප‍්‍රතිකාර ගන්න අවශ්‍ය නැති තත්ත්වයක් උද්ගත වෙමින් පවතිනවා. වෛද්‍යවරයා මුණ ගැහෙන්න පවා අවශ්‍ය නොවන තත්ත්වයක් මේ නවීන තාක්ෂණයත් එක්ක ඇතිවෙමින් තිබෙනවා. වෛද්‍යවරයා මුණ නොගැසි තාක්ෂණය උපකාරි කරගනිමින් අවශ්‍ය උපදෙස් ප‍්‍රතිකාර ලබා ගැනීමේ හැකියාව අද තියෙනවා.

පළවෙනි ලෝක යුද්ධය අවසන් වීමත් සමඟ උණ රෝගයක් හේතුවෙන් මිලියනයක් පමණ  මියගියා.  ලංකාව ගත්තම අපි සෞඛ්‍ය අංශය දියුණු කරගෙන තියෙනවා. ඒක අපි  තවදුරටත් රඳාපවත්වා ගත යුතුයි.  නවීන තාක්ෂණය යොදා ගනිමින් එය තවත් දියුණු කළ යුතුයි.

ළමයින්ට පාසල් අධ්‍යාපනයත් සමඟ නවීන තාක්ෂණය කෙරෙහි අධ්‍යාපනයක් ලබා දිය යුතුයි. ඔවුන් නව තාක්ෂණය කෙරෙහි නැඹුරු කළ යුතුයි.

ජාතික ඩිජිටල් ප‍්‍රතිපත්තියක් දැන් සකස් කරමින් යනවා. එය පාර්ලිමේන්තුවට දාලා සම්මත කර ගැනීමට ඉදිරියේදී කටයුතු කරනවා.

දැන් සමාජය නිරන්තරයෙන්ම වෙනස් වෙනවා.  ඉස්සර 55න්  60න් සමහරු විශ‍්‍රාම යනවා. දැන් සමහරු  කැමතියි 70 ව 80 ව වෙනකම් වුනත් වැඩ කරන්න.  සමහරු අසූව අනුව වෙනකම් ජීවත් වෙන්න උත්සාහ කරනවා. සෞඛ්‍ය දියුණුවත් එක්ක ඒ සඳහා අවස්ථාව උදා වෙලා තියෙනවා.

සෞඛ්‍ය දියුණුවත් එක්ක  ආයු කාලය වැඩි වෙන්න වැඩි වෙන්න ඒ අය බලාගන්නේ කොහොමද ඒ සඳහා වැඩපිළිවළක් සකස් කරන්නේ කොහොමද ඒ සඳහා අවශ්‍ය මුදල් සපය ගන්නේ කොහොමද කියලා රටකට බලන්න සිද්ධ වෙනවා.

ඒ අනුව ආයුකාලය වැඩිවීමට සරිලන ලෙස විශ‍්‍රාම වැටුප්, වැඩිහිටි දීමනා පිලිබඳවත් අවධානය යොමුකළ යතුයි’’ යනුවෙන්ද අග‍්‍රාමාත්‍ය රනිල් වික‍්‍රමසිංහ මහතා එහිදී පැවැසීය.

ඡායාරූප - ජයමාල් චන්ද්‍රසිරි