(ජයන්ත සමරකෝන්)


ඉන්දියාවේ රෝ ඔත්තු සේවය සමඟ සම්බන්ධකම් පවත්වන කැබිනට් ඇමතිවරු සිව්දෙනෙකු සිටින බව හෙළිකරන සන්ධාන මහ ලේකම්වරයා එවැනි ඇමති මණ්ඩලයක තවදුරටත් නොසිට තම කණ්ඩායම සමඟ වහාම ආණ්ඩුවෙන් ඉවත් විය යුතු  යැයි ශ්‍රී ලංකා නිදහස් පක්ෂ 15 කණ්ඩායමේ පාර්ලිමේන්තු මන්ත්‍රී ඩිලාන් පෙරේරා මහතා අද(25) පැවසීය.


මෙම සිව්දෙනාම එක්සත් ජාතික පක්ෂයේ මිස ශ්‍රී ලංකා නිදහස් පක්ෂයේ නොවන බව දන්නේ නම් තවදුරටත් මේ ආණ්ඩුව තුළ සිටින්නේ මන්දැයි ඔහු ප්‍රශ්න කළේය.


ජනාධිපති ඝාතන කුමන්ත්‍රණයද එක්සත් ජාතික පක්ෂයේ සැලසුමක් බවට එම පරීක්ෂණවල මන්දගාමී බව තුළින් දක්නට ඇතැයිද, අගමැතිවරයා ඉවත්කර කාර්යභාර ආණ්ඩුවක් බිහිකිරීම වහා සිදුවිය යුතු යැයිද හෙතෙම සඳහන් කළේය.


පුංචි බොරැල්ල නිදහස් මාධ්‍ය කේන්ද්‍රයේ පැවති 15 කණ්ඩායමේ මාධ්‍ය සාකච්ඡාවේදී මන්ත්‍රීවරයා මෙම අදහස් පළ කළේය.

(ඡායාරූපය - ශාන්ත රත්නායක)