( +++ ජයන්ත සමරකෝන්)

මාතර ප්‍රදේශයේ බීච් පාටි (වෙරළ සාද) සඳහා එක්ටැසි (ECTASI) නමැති මත්පෙති ගෙන්වා අළෙවි කරන අයෙකු සමග රුපියල් ලක්ෂ 3 ක් පමණ වටිනා මත්පෙති 112 ක් අත්අඩංගුවට ගත් බව සුරාබදු විශේෂ මෙහෙයුම් ඒකකය පවසයි.

බීච් පාටියක් සඳහා මත් පෙති අවශ්‍ය බවට පවසා උපාය දූතයකු යොදවා එමගින් මාතර වෙරළ උද්‍යානයේදී සැකකරු කොටුකර ගත් බවත් පසුව ඔහුගෙන් ලද තොරතුරු මත මාතර ප්‍රදේශයේ මිරිස්ස, දික්වැල්ල, පොල්හේන ප්‍රදේශවල බීච් පාටි සඳහා මත්පෙති සැපයීමේ කොන්ත්‍රාත්තුව ඔහු භාරගෙන ඇති බව හෙළිවූ බවද එම ඒකකයේ ස්ථානාධිපති ප්‍රධාන සුරාබදු පරීක්ෂක පී.එන්. හේමන්ත මහතා ලංකාදීපයට ඊයේ (9) පැවැසීය.

සැකකරු මෙම මත්පෙති අළෙවි කර ඇත්තේ ඉනේ සඟවාගෙන බවද ඔහු කීය.

ඩාන්සින් ටැබ්ලට් නමින් හඳුන්වන මෙම මත්පෙති රුපියල් 1800-2500 අතර මුදලකට අළෙවි කරන අතර බීච් පාටි සඳහා මේවාට ඉහළ ඉල්ලුමක් ඇති බවද පරීක්ෂණවලදී හෙළිවී තිබේ.

අන්තර්ජාලය හරහා මෙම මත්පෙති පිළිබඳව ප්‍රචාරය කර ඇති අතර ජංගම දුරකථනය මගින් අළෙවිය සිදු කෙරෙන බවද හේමන්ත මහතා කීය.

මෙම මත්පෙති වර්ගය මෙරටදී නිපදවන බවට තහවුරු වී නොමැති​ තොරතුරු ගණනාවක්ම සැකකරුගේ ප්‍රකාශවල සඳහන් වන බවද හෙතෙම පැවැසීය.

සුරාබදු කොමසාරිස් ජනරාල් ඒ. බෝදරගම මහතාගේ උපදෙස් පරිදි, ප්‍රධාන සුරාබදු පරීක්ෂක පී.එන්. හේමන්ත මහතාගේ මෙහෙයවීමෙන් සුරාබදු පරීක්ෂක රණවීර හා නියාමකවරුන් වන සිසිල් කරුණාතිලක, හර්ෂ කුමාර, රියැදුරු චන්දන යන මහත්වරු මෙම වැටලීම සිදු කළහ.