ට්විටර් සමාජ ජාලය තුළ දේශපාලන දැන්වීම් ප්‍රචාරය කිරීම නවතා දැමීමට තීරණය කළ බව එහි ප්‍රධාන විධායක නිලධාරී ජැක් ඩෝසි මහතා පවසයි.

දේශපාලනඥයන්ගේ අරමුණ විය යුත්තේ ජනතා විශ්වාසය දිනා ගැනීම බවත් මුදල් වියදම් කර දැන්වීම් දැමීමෙන් එය ඉටු නොවන බවත් හෙතෙම වැඩිදුරටත් පවසා ඇත.

"අන්තර්ජාලය තුළ ප්‍රචාරණය ඇදහිය නොහැකි තරම් බලවත්. එය වාණිජ දැන්වීම්කරුවන්ට  වඩාත් ඵලදායී. එම බලය දේශපාලනයට සැලකිය යුතු අවදානමක් ගෙන එනවා" යැයි ඒ මහතා ට්විටර් පණිවුඩයේ සඳහන් කර ඇත.

කෙසේවුවද මෑතකදී ෆේස්බුක් සමාජ ජාලයේ ප්‍රධානියා දේශපාලන දැන්වීම් තහනම් කිරීම ප්‍රතික්ෂේප කළේය.

මෙය ඇමරිකානු ජනපති සහ කොන්සර්වේටිව්වරුන් නිහඬ කිරීමට වාමාංශික කොටස් දරන තවත් උත්සාහයක් බව ට්‍රම්ප්ගේ කළමණාකරුවකු වන බ්‍රැඩ් පාර්ස්කල් මහතා පවසා ඇත.

නොවැම්බර් මාසයේ සිට ට්විටර් පරිශීලකයන්ට මෙම උපදෙස් පිළිපැදීමට සිදුවනු ඇතැයි ඩෝසි මහතා පවසයි.

(බීබීසී ඇසුරිණි - 085)