( තිළිණි ද සිල්වා )

ජපානයෙන් මිලියන 4.2ක වටිනාකමකින් යුතු ඉන්ධන තොගයක් වංචනික ලෙස මිලදී ගැනීමේ සිද්ධියක් සම්බන්ධයෙන් සැකපිට ශ්‍රී  ලාංකිකයකු ජපානයේ ටෝකියෝ නුවරදී අත්අඩංගුවට ගෙන ඇතැයි ශ්‍රී ලංකා තානාපති කාර්යාලය ආරංචි මාර්ග සදහන් කරයි.

මෙලෙස අත්අඩංගුවට පත් වූයේ  20 හැවිරිදි ලාංකික තරුණයකු යැයි ද සඳහන් වේ.

මෙම ශ්‍රී ලාංකිකයා තවත් පුද්ගලයින් දෙදෙනකු සමඟ එක්ව වෙනත් පුද්ගලයින්ගේ ක්‍රෙඩිට් කාඩ්පත් වංචනික ලෙස යොදා ගනිමින් මෙම වංචාව සිදුකර ඇති බව ටෝකියෝ පොලිසීය විසින් හෙළිකර ගෙන ඇතැයි ද එම ආරංචි මාර්ග වැඩිදුරටත් කියා සිටී.

සැකකාර ලාංකිකයා ඇතුළු පිරිස ඉකුත් වසරේ ඔක්තෝබර් මාසයේ දී එරට ඉබාරකී ප්‍රදේශයේ ඉන්ධන හල්වලින් ඉන්ධන ලීටර් 40,000ක පමණ ප්‍රමාණයක් වංචනික ලෙස ලබාගෙන ඇති අතර ඒ සම්බන්ධයෙන් ටෝකියෝ පොලීසිය සිදුකළ දීර්ඝ විමර්ශනයකින් පසුව සැකකරුවන් අත්අඩංගුවට ගැනීමට හැකිව ඇතැයි ද එම ආරංචි මාර්ග වැඩිදුරටත් කියා සිටී.

ඔවුන් විවිධ අවස්ථාවලදී එම පළාතේ පිහිටි ඉන්ධනහල් 10 කින් ජපනයෙන් මිලියන 4කට අධික වටිනාකමකින් යුතු ඉන්ධන තොගයක් ලබාගෙන ඇති බව පොලීසිය සිදුකළ විමර්ශනවලදී අනාවරණය වී තිබේ.