( දසුන් රාජපක්ෂ ) 
 
හිටපු ජ්‍යෙෂ්ඨ අතිරේක සොලිසිටර් ජනරාල් ජනාධිපති නීතීඥ වසන්ත නවරත්න බණ්ඩාර මහතා දේශපාලන පළිගැනීම් පිළිබඳව විමර්ශනය කරන ජනාධිපති කොමිසම හමුවේ  සමාව ගැනීමෙන් පසු කොමිසමේ  අද (13) කටයුතු සාමාන්‍ය පරිදි  ආරම්භ කෙරිණි.
 
ජනාධිපති කොමිසම තුළ කළහකාරී ලෙස හැසිරෙමින්  සාක්ෂිකරුවන්ට පහත් වචනයෙන් කතා කිරීම, සහ පැමිණිල්ලේ නීතීඥවරයාට තර්ජනය කිරීම හේතුවෙන්   නවරත්න බණ්ඩාර මහතා  පොලිස් බාරයට පත් කර අත්අඩංගුවට ගැනීමට සිදු වන බව ජනාධිපති කොමිසමේ සභාපති විශ්‍රාමික ශ්‍රේෂ්ඨාධිකරණ විනිසුරු උපාලි අබේරත්න මහතා අවධාරණය කිරීමෙන් පසු  එලෙස සමාව ගැනීමට ඔහු  කටයුතු කළේය.

 අවන්ට්ගාඩ් සිද්ධියට අදාළ පැමිණිල්ල ( 13) ජනාධිපති කොමිසම හමුවේ විභාගයට ගත් අවස්ථාවේදී  සාක්ෂි ලබා දුන් හිටපු සොලිස්ටර් ජනරාල් සුහද ගම්ලත්  මහතාට පහත් වචනයෙන් කතා කළ වසන්ත නවරත්න බණ්ඩාර මහතා ඊට එරෙහි වූ ජනාධිපති නීතීඥ  කුමේර ද සොයිසා මහතාටද තර්ජනය කළේය.
 එම අවස්ථාවේදී ජනාධිපති කොමිසම තුළ දැඩි කළබළයක් ඇති වූ අතර එය සමතයකට  පත් කිරීම සඳහා අවස්ථා කිහිපයකදී  කොමිසමේ සභාපතිවරයා උත්සාහ කළද  පැවති තත්ත්වය හමුවේ සභාපතිවරයාට කොමිසමේ කටයුතු පවත්වාගෙන යාමට නොහැකි තත්ත්වයක් උදා විය.
 
 ඉන්පසු සන්සුන් ලෙස  හැසිරෙන ලෙස වසන්ත නවරත්න බණ්ඩාර මහතාට නියම කළ කොමිසමේ සභාපතිවරයා එසේ නොවන්නේ නම් ඔහු අත්අඩංගුවට ගැනීමට සිදු වන බව කියා සිටියේය.