(ඩයනා උදයංගනී)

එක්සත් ජාතික පක්‍ෂය විසින් පසුගියදා පාර්ලිමේන්තුවට ඉදිරිපත් කිරීමට සැරසුණු ජාතික ආණ්ඩු යෝජනාව හකුලා ගත්තේ පරදින බව දන්නා නිසා යැයි ශ්‍රී ලංකා නිදහස් පක්‍ෂ තරුණ පෙරමුණේ සභාපති, පාර්ලිමේන්තු මන්ත‍්‍රී ශාන්ත බණ්ඩාර මහතා පැවසීය.

ඔවුන් තවමත් ඊනියා ජාතික ආණ්ඩුවක් බිහිකරගෙන ඇමතිධූර වැඩිකරගැනීමට උත්සාහ කරමින් සිටින බව ද මන්ත‍්‍රීවරයා පැවසුවේය.

මාකදුරේ මධුෂ් වැනි පාතාල නායකයින්, මත්ද්‍රව්‍ය ජාවාරම්කරුවන් සමඟ ඇතැම් දේශපාලකයින් සහයෝගයෙන් කටයුතු කර තිබීම ගැන රටක් ලෙස කණගාටු විය යුතු බව කී ශාන්ත බණ්ඩාර මහතා ඔවුන් සැබෑ ජනතා නියෝජිතයින් නොවන බව ද කීවේය.

ශාන්ත බණ්ඩාර මහතා මේ බව පැවසුවේ කොළඹ, ඩාර්ලි පාරේ පිහිටි ශ්‍රී ලංකා නිදහස් පක්‍ෂ මූලස්ථානයේදී අද (12) පැවති මාධ්‍ය හමුවක් අමතමිනි.