(ජේ.කේ.එල් චාමින්ද)
 
ඇදහැළෙන වර්ෂාවත් සමඟ ගිංගඟේ  තවලම ජල මාපකයේ ජල මට්ටම අද (22) උදෑසන 8.00 ට පමණ වන විට මිටර් 4.17 දක්වා සුළු වැඩිවීමක් දක්නට තිබූ බව ගිංගඟ වාරිමාර්ග ඉංජිනේරු නිලංග සුභසිංහ මහතා පවසයි.

සුළු ගංවතුර තත්වයක් ඇතිවීම සඳහා තවලම ජල මාපකයේ ජල මට්ටම මීටර් 4.5 දක්වා වැඩිවිය යුතු අතර මේ වනවිට සුළු ගංවතුර තත්වයකට  පවා ජල මට්ටම ඉහළ ගොස් නොමැති බවද  වාරිමාර්ග  ඉංජිනේරු සඳහන් කළේය.

බද්දේගම ජල මාපකයේ අද (22) වන විට ජල මට්ටම මිටර් 3.09 දක්වා සුළු වැඩිවිමක් දක්නට තිබූ බව පවසන වාරිමාර්ග ඉංජිනේරු  ගිංගඟ අනාරක්ෂිත කලාපයේ පහත්බිම් ජලයෙන් යටවී ඇති බවද සඳහන් කළේය.

මේවනවිට ජලය බැසයාම සඳහා ගිංතොට හා මහමෝදර යන මෝය කටවල් විවෘත කර ඇති බවද වාරිමාර්ග ඉංජිනේරු වැඩිදුරටත් සඳහන් කළේය. 

එමෙන්ම ගංගඟේ වක්වැල්ල පාලමේ ඇදිවල සිරවී ඇති සුන්බුන් ඉවත් කිරිමේ කටයුතු  නාවික හමුදාව මගින් සිදුකරන අතර ඒ සඳහා  ගිංගඟ වාරිමාර්ග ඉංජිනේරු කාර්යාලයේ ද සහයෝගය ලැබී තිබේ.

ඇදහැලෙන වර්ෂාවත් සමඟ ගොයම් කපා ගැනීමට නොහැකි වීමෙන්  ගොවීන් අපහසුතාවයට පත්ව සිටින බව ගොවීහු පවසති. දැනට ගොයම් පැසී තිබෙන කුඹුරුවලට ජලය පතිතව තිබීමෙන්  අස්වැන්න නෙළා ගැනීමට නොහැකි තත්වයක් උදාවී තිබේ.

ගතවු පැය 24 තුළ ගාල්ල දිස්ත්‍රික්කයේ වැඩිම වර්ෂාපනය පතිත වී ඇත්තේ ඉමදුව හා යක්කලමුල්ල යන ප්‍රදේශවලට වන අතර ඉමදුවට මිලිමිටර් 167ක වර්ෂාපතනයක් හා යක්කලමුල්ලට මිලිමිටර් 106 වර්ෂාපතනයක් පතිත වී තිබූ බව ආපදා කළමනාකරණ ඒකකය පවසයි.